80-vjetori i gazetës historike: Pulla postare e “Rilindjes” i besohet Bibliotekës Kombëtare

Në kuadër të shënimit të tetë dekadave nga themelimi i gazetës emblematike “Rilindja”, institucioni ynë më i lartë i librit është pasuruar me një eksponat të veçantë. Pulla postare kushtuar këtij mediumi historik i është dorëzuar zyrtarisht Bibliotekës Kombëtare të Kosovës “Pjetër Bogdani”. Me këtë rast, drejtoresha e Bibliotekës Kombëtare, Dr. Blerina Rogova Gaxha, ka mirëpritur në një takim zyrtar drejtorin e Drejtorisë për Zhvillimin e Biznesit në Postën e Kosovës, Ferki Maxhuni, i cili ishte i shoqëruar nga bashkëpunëtorët e tij. Gjatë këtij takimi, përfaqësuesi i Postës së Kosovës, Maxhuni, i ka dorëzuar drejtoreshës Rogova Gaxha pullën postare të “Rilindjes”, duke e cilësuar atë si një dëshmi të rëndësishme të kujtesës kolektive dhe të pasurisë kulturore e historike që mbart kjo gazetë ndër vite. Ky akt solemn i dorëzimit u realizua në kuadër të aktiviteteve të Javës së Bibliotekës në Kosovë. Edicioni i këtij viti i këtij manifestimi tradicional i është kushtuar pikërisht trashëgimisë së bujshme të gazetës “Rilindja”, duke u zhvilluar nën patronatin e temës “Rilindja – Zëra në kujtesë”.