Von der Leyen pas takimit me Kurtin: Vendimi i Hagës ngjalli ndjenja të forta, por mandati i gjykatës duhet respektuar

Presidentja e Komisionit Evropian, Ursula von der Leyen, ka vlerësuar se Kosova ndodhet në një udhëkryq të rëndësishëm politik, ndërsa ka përsëritur mbështetjen e palëkundur të bllokut evropian për vendin. Gjatë konferencës së përbashkët për shtyp me kryeministrin Albin Kurti, kryetarja e ekzekutivit evropian përmendi ndihmën e gjithanshme që BE-ja i ka dhënë Kosovës ndër vite në fushën e rindërtimit, zhvillimit ekonomik, zbatimit të reformave dhe ndërtimit të institucioneve demokratike e moderne. Duke u ndalur te vendimi i fundit i Dhomave të Specializuara në Hagë ndaj ish-udhëheqësve të Ushtrisë Çlirimtare të Kosovës, ajo pranoi se ky zhvillim ka prodhuar valë emocionesh të fuqishme në mbarë vendin. “E çmoj angazhimin tuaj të matur. Aktgjykimi është dhënë nga një institucion i pavarur gjyqësor dhe mandati i tij duhet të respektohet”, u deklarua Von der Leyen para gazetarëve. Gjatë fjalës së saj, ajo solli në vëmendje një mesazh thelbësor lidhur me natyrën e këtij procesi gjyqësor, duke qenë e qartë në qëndrimin e saj. “Rezistenca e Kosovës nuk ka qenë në gjykim.”, ritheksoi ajo. Në vijim të fjalës, zyrtarja e lartë evropiane u ndal te domosdoshmëria e ruajtjes së stabilitetit institucional, duke vënë theksin te funksionimi i rregullt i Kuvendit dhe i Qeverisë. Ajo bëri thirrje për hapësirë dialogu mes forcave politike, duke e cilësuar këtë si çelës për të kapërcyer ngërçin aktual politik në të cilin ndodhet vendi. Në mbyllje të prononcimit të saj, Von der Leyen riafirmoi angazhimin e Bashkimit Evropian për krah Kosovës, duke inkurajuar avancimin e mëtejshëm të reformave, rritjen ekonomike dhe konsolidimin e mëtejshëm të shtetit ligjor dhe demokratik.