Reagim i fortë nga diaspora: Deklarata e Kuvendit për Specialen lë në harresë fatin e viktimave dhe të vërtetën

Miratimi i fundit i deklaratës nga Kuvendi i Kosovës, lidhur me aktgjykimin e Gjykatës Speciale, ka ngritur dilema dhe reagime të ashpra në opinionin publik. Ndër të parët që ka ngritur zërin është mjeku, humanisti dhe intelektuali nga diaspora, Dr. Shaqir Shala, i cili ka vënë në pikëpyetje legjitimitetin e këtij qëndrimi institucional në raport me viktimat dhe përgjegjësinë individuale. Në një reagim të hapur publikuar këtë të premte, Shala ka kërkuar sqarime të prera mbi fatin e personave që dikur u cilësuan si “tradhtarë”, “spiunë” apo “bashkëpunëtorë të Serbisë”. Sipas tij, për çdo etiketim të tillë duhet të ekzistojnë prova konkrete, ndërsa familjet e viktimave meritojnë të mësojnë të vërtetën e plotë rreth vrasjeve të tyre, duke mos lejuar që lufta e lavdishme e Ushtrisë Çlirimtare të Kosovës të përdoret si mburojë për krime të mundshme individuale. “Kur Kuvendi flet për vendimin e Hagës, në emër të kujt po flet?” – pyet Shala, duke shtuar se institucionet nuk kanë marrë kurrfarë mandati prej tij për të mohuar ose relativizuar vendimet gjyqësore. Ai thekson se mbrojtja e vlerave të UÇK-së nuk nënkupton mbulimin e shkeljeve apo fajësisë personale, por përkundrazi, nderohet vetëm atëherë kur ka guximin të përballet me të vërtetën për çdo viktimë dhe autor. Intelektuali nga diaspora e bën të qartë se nëse ekzistojnë dëshmi se dikush ka bashkëpunuar me regjimin serb, atëherë drejtësia duhet të flasë përmes fakteve. Megjithatë, ai thekson se në mungesë provash, akuzat politike dhe etiketat si “tradhtar” nuk mund të shërbejnë kurrë si dënim me vdekje, dhe se familjet kanë të drejtën legjitime të dinë se kush i vrau më të dashurit e tyre. Duke e përmbyllur reagimin e tij në cilësinë e mjekut, humanistit, intelektualit dhe pjesëtarit të mërgatës, Dr. Shaqir Shala bën thirrje që sakrifica e diasporës për Kosovën të mos shfrytëzohet si alibi për heshtje. Ai kërkon nga autoritetet që të zbardhin çdo rast përmes dokumenteve dhe fakteve, duke lënë që drejtësia të ndëshkojë fajtorët dhe të pastrojë emrat e atyre që janë stigmatizuar padrejtësisht.