E ardhmja e Alexis Mac Allister në dyshim te Liverpooli, Real Madridi përgatit terrenin për mesfushorin

Alexis Mac Allister rrezikon një të ardhme të paqartë në Anfield, një zhvillim ky që ka aktivizuar menjëherë skautët dhe drejtuesit e Real Madridit në tregun e transferimeve. Sipas burimeve mediatike nga Anglia, drejtuesit e klubit nga Premierliga nuk kanë në plan t'i ofrojnë një marrëveshje të re mesfushorit, aktualisht e vlefshme deri në verën e vitit 2028. Për rrjedhojë, si lojtari ashtu edhe drejtuesit e Liverpoolit mund të shqyrtojnë një ndarje të mundshme gjatë merkatos së verës në vitin 2027. Kjo situatë ka rritur ndjeshëm interesimin e Real Madridit, që po ndjek me vëmendje çdo lëvizje të yllit argjentinas. Gjiganti nga Madridi e vlerëson Mac Allisterin si një nga alternativat kryesore për të shtuar kualitetin në repartin e mesfushës, nëse largimi i tij nga Anglia bëhet realitet në të ardhmen e afërt. Klubi spanjoll mbetet i fokusuar te kompletimi i mesfushës, një sektor që përbënte prioritet kryesor gjatë afatit kalimtar veror. Në planet e hershme të madrilenëve ishte futur edhe Rodri, i cili më vonë firmosi me Barcelonën. Ndërkohë, falë qëndrimit të Eduardo Camavingas në “Santiago Bernabeu”, hapësirat për ndonjë goditje shtesë në mesfushë u mbyllën. Megjithatë, skenarët mund të pësojnë kthesa në sesionet e ardhme të transferimeve, sidomos nëse largimet nga skuadra lirojnë vend për fytyra të reja. Në fakt, emri i Mac Allisterit figuronte lart në listën e dëshirave të Real Madridit gjatë muajve të verës. Reprezentuesi i Argjentinës renditej pas Enzo Fernandezit dhe Rodrit, me këtë të fundit që ishte zgjedhja e parë e klubit, pavarësisht se operacioni përfundimisht dështoi. Prandaj, shtegu për transferimin e Mac Allisterit mund të rihapet seriozisht përpara verës së vitit 2027, sidomos nëse politika e Liverpoolit ndaj kontratës së tij nuk ndryshon. Edhe anglezët mund të tregohen të hapur për një shitje të mundshme, duke marrë parasysh vendimin e brendshëm për të mos i zgjatur bashkëpunimin mesfushorit. Duke komentuar hapur mbi pozitën e tij kontraktuale, vetë Mac Allister deklaroi: “Siç e dinë të gjithë, mora lajmin se klubi nuk ishte në gjendje të më ofronte një kontratë të re, gjë që më bën shumë, shumë të trishtuar. Sigurisht, ka ende kohë. Tifozët nuk kanë nevojë të shqetësohen, sepse do të jap 100 për qind deri në ditën e fundit që do të jem këtu. Do të shohim se çfarë do të ndodhë. Kishte mundësi për t’u larguar këtë verë dhe mendoj se tani për tani jam në klubin e duhur dhe kam mentalitetin për të dhënë 100 për qind për këtë klub”. Tani mbetet për t'u parë se si do të rrjedhin ngjarjet, ndërsa Real Madridi mbetet në gatishmëri të plotë për të ndërhyrë nëse Liverpooli refuzon t'i rinovojë kontratën lojtarit.