Zgjedhja e presidentit, Kurti nis takimet me opozitën: Afati i fundit skadon më 6 tetor

Kryeministri i Kosovës, Albin Kurti, ka paralajmëruar se gjatë ditës së sotme do të nisë rundin e kontakteve me liderët e partive opozitare, me qëllim arritjen e një konsensusi për zgjedhjen e kreut të ri të shtetit. Kreu i ekzekutivit sqaroi se këto bisedime do të hapen menjëherë pas përmbylljes së takimit zyrtar që ai ka me presidenten e Komisionit Evropian, Ursula von der Leyen. Këto paralajmërime Kurti i bëri gjatë një deklarate për media, pas homazheve të bëra në nderim të ish-rektorit të Universitetit të Prishtinës “Hasan Prishtina”, Ejup Statovci. “Posa të përfundojmë me takimin që kemi sot me presidenten e Komisionit Evropian, zonjën Ursula von der Leyen, menjëherë do të fillojmë komunikimet për takime me krerët e opozitës, në mënyrë që të mos jemi pa Kuvend më 7 tetor, por më së largu deri më 6 tetor ta kemi presidentin apo presidenten e re”, u shpreh kryeministri Kurti. Në këtë mënyrë, shefi i qeverisë ka vënë theksin te domosdoshmëria e një akordi politik para se të digjet afati i përcaktuar kushtetues. Sipas afateve ligjore, procesi i zgjedhjes së presidentit duhet të mbyllet jo më larg se data 6 tetor. Në rast dështimi të Kuvendit për të zgjedhur presidentin e ri brenda këtij afati, vendi do të detyrohet të shkojë në zgjedhje të reja parlamentare. Teksa orët po pakësohen, dinamika e takimeve mes subjekteve politike parlamentare vlerësohet si kyçe për të shmangur ngërçin institucional dhe për t'i dhënë vendit presidentin e ri.