Sulm kibernetik në Korenë e Jugut: Bien pre e hakerave të dhënat e mijëra klientëve të bankës

Një sulm i rëndë kibernetik ka goditur sistemin e “Shinhan Bank” në Korenë e Jugut, duke rezultuar në ekspozimin e të dhënave personale për rreth 25 mijë klientë. Sipas njoftimeve zyrtare, informacionet e komprometuara përfshijnë emrat, numrat e telefonit dhe të ardhurat vjetore të qytetarëve, ngjarje kjo e regjistruar gjatë ditës së djeshme. Pas këtij incidenti të sigurisë, Shërbimi i Mbikëqyrjes Financiare ka nisur menjëherë një inspektim në terren për të zbardhur rrethanat e ngjarjes. Nga ana e saj, “Shinhan Bank” deklaroi se ka zbatuar masa urgjente me qëllim zbutjen e dëmeve të mundshme që mund t'u kanosen përdoruesve të prekur. Ky rast vjen në një periudhë kur Koreja e Jugut po përballet me një valë incidentesh të ngjashme të sigurisë kibernetike. Si kundërpërgjigje ndaj këtyre shkeljeve, autoritetet koreane kanë intensifikuar masat ndëshkimore, duke rritur ndjeshëm gjobat për shkelësit muajin e kaluar. Bazuar në Ligjin e përditësuar për Mbrojtjen e të Dhënave Personale, individët apo subjektet që shpallen përgjegjëse për rrjedhje masive që prekin mbi 10 milionë persona, rrezikojnë sanksione financiare deri në 10 për qind të xhiros së tyre totale. Shtrëngimi i masave pason vendimin e Komisionit të Mbrojtjes së Informacionit Personal të Koresë së Jugut, i cili në korrik të këtij viti vendosi një gjobë prej afërsisht 54 miliardë uonësh (rreth 37.43 milionë dollarë) ndaj gjigantit të telekomunikacionit KT Corp., për shkak të ekspozimit të të dhënave të klientëve përgjatë viteve 2024 dhe 2025. Statistikat tregojnë se vetëm vitin e kaluar rreth 48 milionë qytetarë u prekën nga shkeljet e privatësisë, kryesisht në sektorin privat. Ndërkohë, midis viteve 2021 dhe 2025, shërbimet e inteligjencës në vend kanë identifikuar mbi 100 episode të transferimit të paligjshëm të teknologjive industriale jashtë vendit. Të dhënat zyrtare të dorëzuara në parlament nga Ministria e Tregtisë, Industrisë dhe Burimeve dëshmojnë se nga gjithsej 107 raste të regjistruara të kësaj natyre, pothuajse 40 për qind e tyre i përkisnin sektorit strategjik të gjysmëpërçuesve.