Operacioni i sigurisë në Maqedoni: Goditet rrjeti propagandistik pro-rus që shpërndante dezinformata dhe ksenofobi

Agjencia për Siguri Kombëtare (ASK), në bashkëpunim të ngushtë me Ministrinë e Punëve të Brendshme (MPB) dhe Prokurorinë Themelore Publike (PTHP), ka ndërmarrë operacione për identifikimin dhe neutralizimin e një rrjeti propagandistik në vend, i cili dyshohet se ndjek një agjendë shkatërruese për të manipuluar opinionin publik në shërbim të interesave të huaja. Sipas njoftimit zyrtar të ASK-së, hetimet janë fokusuar te një shtetas i Maqedonisë, i cili bashkëpunon me qendra të huaja që kontrollojnë një infrastrukturë mediatike të shtrirë edhe brenda hapësirës informative vendase. Gjatë kontrollit të ushtruar në banesën e të dyshuarit, autoritetet kanë zbuluar dhe konfiskuar prova materiale, të cilat tashmë po i nënshtrohen analizave të hollësishme ekspertizuese. Autorët e vërtetë të kësaj fushatë propagandistike, që sipas autoriteteve shërben për interesat ruse, operojnë përmes faqeve të rreme të internetit me domene vendase. Këto portale shërbejnë si kanale për shpërndarjen e lajmeve të rreme dhe manipulimin e ngjarjeve aktuale, me qëllim dëmtimin e besueshmërisë ndaj institucioneve shtetërore dhe nxitjen e tensioneve etnike e kombëtare. Në komunikatën zyrtare theksohet se më 18 shtator 2026, si rezultat i aksionit të përbashkët të koordinuar mes ASK-së, MPB-së dhe PTHP-së, u ndërmorën veprime ligjore ndaj shtetasit maqedonas të lidhur me strukturat e huaja propagandistike. Ky operacion përbën një hap të rëndësishëm në parandalimin e ndikimeve të jashtme që synojnë të deformojnë realitetin politik dhe social në vend. Sipas institucioneve të sigurisë, ekzistojnë dyshime të bazuara se i dyshuari ka kryer disa vepra penale, duke përfshirë “Shkaktimin e urrejtjes, përçarjes dhe jotolerancës kombëtare, racore dhe fetare” sipas nenit 319, “Zbulimin e sekretit zyrtar” sipas nenit 360, si dhe “Përhapjen e materialeve raciste dhe ksenofobike përmes sistemit kompjuterik” sipas nenit 394-g të Kodit Penal. Ky rast është vazhdimësi e operacioneve të mëparshme kundër aktiviteteve hibride pro-ruse në vend, ku autoritetet kishin ngritur tashmë kallëzim penal ndaj një tjetër shtetasi për të njëjtat vepra penale që lidhen me përhapjen e materialeve raciste dhe ksenofobike në rrugë digjitale. Në përfundim, Agjencia për Siguri Kombëtare ka garantuar se do të vijojë angazhimet e saj ligjore për të zbuluar dhe bllokuar çdo strukturë subversive apo rrjet mediash të lidhur me qarqe politike rajonale pro-ruse, të cilat synojnë të dëmtojnë drejtpërdrejt rrugëtimin strategjik të integrimit evropian të vendit.