Tragjedia në Spitalin e Manastirit: Aktakuzë ndaj pesë mjekëve për vdekjen e 40-vjeçares nga mosdiagnostikimi i trombozës

Prokuroria Themelore Publike e Manastirit ka zyrtarizuar aktakuzën ndaj pesë mjekëve internistë të Spitalit Klinik “Dr. Trifun Panovski”, nën dyshimin për veprën penale “Krime të rënda kundër shëndetit të njeriut”, pas hetimeve të kryera mbi rrethanat e vdekjes së një gruaje 40-vjeçare. Sipas organit të akuzës, ngjarja ka ndodhur gjatë periudhës nga 28 maji deri më 4 qershor 2024, ku të pandehurit dyshohet se kanë treguar neglizhencë në trajtimin e pacientes në repartin e mjekësisë interne, duke sjellë përkeqësim fatal të gjendjes së saj shëndetësore. E ndjera ishte paraqitur në spital e pajisur me udhëzim nga mjeku i familjes, i cili kishte ngritur dyshime për tromboflebit. Megjithatë, mjekët në repart e kishin diagnostikuar gabimisht me artrit reumatoid, pa kryer analiza të detajuara apo një anamnezë të plotë, dhe e kishin kthyer atë në shtëpi pas dhënies së terapisë. Nga kjo lëshim paraprak, patologjia e vërtetë e pacientes mbeti e pazbuluar, duke pamundësuar trajtimin e duhur të trombozës në fazën e saj fillestare dhe duke shuar çdo shans real për të frenuar përparimin e sëmundjes që i rrezikonte jetën. Gjendja e 40-vjeçares u përkeqësua ndjeshëm, çka e detyroi atë të rikthehej sërish në spital më 1 qershor me dhimbje të padurueshme abdominale. Pavarësimit të shtrimit të saj dhe rezultateve shqetësuese të analizave laboratorike, mjekët kujdestarë përgjatë katër ditëve në vijim nuk ndërmorën asnjë hap shtesë për të zbuluar shkakun e vërtetë dhe për të ndryshuar skemën e trajtimit. Përballë përkeqësimit drastik, familjarët kërkuan ndihmë në një institucion shëndetësor privat në Shkup më 4 qershor në pasdite, ku pacientja u pranua në gjendje kritike. Gjatë operacionit urgjent kirurgjik u konstatua se ajo vuante nga tromboza e arterieve mezenterike të sipërme dhe të poshtme, e cila kishte shkaktuar gangrenë të plotë të zorrës së hollë dhe të trashë. Për shkak të avancimit të gjendjes, ndërhyrja rezultoi e pamundur për t'i shpëtuar jetën, dhe e dëmtuara ndërroi jetë më 5 qershor 2024.