Gjermani: Dy shtetas nga Kosova dërgohen në paraburgim, dyshohen për zjarrvënie të qëllimshme dhe tentativë vrasjeje

Dy qytetarë nga Kosova, të moshës 58 dhe 37 vjeç, kanë rënë në prangat e autoriteteve gjermane dhe aktualisht ndodhen nën masën e paraburgimit. Ata dyshohen seriozisht se qëndrojnë pas dy ngjarjeve të rënda të zjarrvënies, ndërkohë që për njërin prej rasteve po zhvillohen hetime edhe për veprën penale të tentativës për vrasje. Operacioni hetimor, i zhvilluar bashkërisht nga Policia e Ludwigsburgut dhe Prokuroria e Stuttgartit, ka lidhur dy të pandehurit me dy incidente të ndara që kanë tronditur zonën, të regjistruara gjatë muajit nëntor të vitit 2025 dhe mars të vitit 2026. Ngjarja e parë u shënua më 11 nëntor 2025 në një banesë në katin përdhes të një pallati shumëbanësh në rrugën Brunnenstraße në Boblingen. Rreth orës 19:15, një banor dëgjoi një krismë të fortë dhe menjëherë pas kësaj konstatoi se apartamenti ishte përfshirë nga flakët, të cilat u përhapën shpejt edhe në ballkon, duke shkaktuar thyerjen e xhamave si pasojë e nxehtësisë ekstreme. Për arsye sigurie, rreth 28 banorë të ndërtesës dhe dy objekteve përreth u desh të evakuoheshin urgjentisht. Fatmirësisht, nga ky incident nuk pati persona të lënduar, ndërsa dëmi material u llogarit paraprakisht në rreth 50 mijë euro. Pas hetimeve intensive, dyshimet e para u drejtuan nga 58-vjeçari kosovar, çka më pas solli në zbulimin edhe të bashkëpunëtorit të tij të dyshuar, 37-vjeçarit po ashtu nga Kosova. Organet e rendit dyshojnë se 58-vjeçari ka paguar ose nxitur 37-vjeçarin për t'i vënë flakën një shtëpie në Jagerholzweg, në zonën e Weil im Schonbuch-Breitenstein, ngjarje kjo e datës 29 mars 2026. Në çastin kur nisi zjarri, brenda banesës ndodhej një grua 86-vjeçare, e cila u zgjua rreth orës 21:00 nga alarmi i tymit dhe arriti të shpëtojë duke dalë jashtë së bashku me qenin e saj. Ekipeve të zjarrfikësve iu deshën rreth tri orë punë e mundimshme për të vënë situatën nën kontroll. Shtëpia pësoi dëme kolosale dhe u shpall e pabanueshme, ndërsa dëmi material u vlerësua në rreth 200 mijë euro. Për shkak të rrethanave kritike dhe rrezikut real për jetën e të moshuarës që ndodhej brenda, ky rast po hetohet zyrtarisht edhe si tentativë vrasjeje. Falë bashkëpunimit mes policive kriminale të Ludwigsburgut dhe Kielit, dy të dyshuarit u kapën në fillim të muajit shtator. Gjatë datave 3 dhe 4 shtator, me kërkesë të Prokurorisë, ata dolën para gjyqtarit në Gjykatën e Qarkut të Stuttgartit, i cili vendosi masën e sigurisë ndaj tyre. Ndërkohë, procesi hetimor vijon intensivisht, ndërsa autoritetet gjermane po punojnë për të zbardhur plotësisht dinamikën, shkallën e përfshirjes së secilit të dyshuar dhe motivet e vërteta që çuan në këto krime.