Marrëdhëniet Uashington-Tiranë, Ambasada e SHBA-së: Një shekull miqësi dhe vizion i përbashkët për të ardhmen

Kryediplomati amerikan në Tiranë, Eric Wendt, ka zhvilluar një takim zyrtar me ministrin për Europën dhe Punët e Jashtme, Ferit Hoxha, në kuadër të aleancës së fortë dhe raporteve tradicionale ndërmjet dy shteteve. Ngjarja u bë publike nga vetë Misioni Diplomatik i Shteteve të Bashkuara në Shqipërisë përmes një njoftimi zyrtar në rrjetet sociale, ku u vu në dukje rëndësia e këtij takimi për të rikonfirmuar lidhjet e ngushta që kultivohen prej mbi njëqind vitesh, si dhe për të shkëmbyer ide rreth mundësive të reja të bashkëpunimit dypalësh. Në mesazhin e shpërndarë nga selia diplomatike amerikane, theksohet se ky partneritet jetësor mbështetet mbi themelet e forta të mirëkuptimit dhe historisë së përbashkët. “Një partneritet historik me një vizion të përbashkët për të ardhmen. Ambasadori Eric Wendt u takua me Ministrin për Europën dhe Punët e Jashtme, Ferit Hoxha, për të vlerësuar një lidhje mbi 100-vjeçare”, thuhet në njoftimin e Ambasadës Amerikane. Në vijim të deklaratës, është evokuar e kaluara dhe kontributi i çmuar i dhënë nga administrata amerikane, duke përmendur angazhimin e vendosur të Presidentit Woodrow Wilson në mbrojtje të shtetësisë dhe kufijve të Shqipërisë gjatë periudhave kritike. “Që nga mbështetja e Presidentit Wilson për një Shqipëri të pavarur, te bashkëpunimi ynë i sotëm si aleatë të NATO-s, ne vazhdojmë të zgjerojmë bashkëpunimin në tregti, sigurinë energjetike dhe lidhjet mes njerëzve, duke forcuar paqen dhe stabilitetin në të gjithë Ballkanin Perëndimor”, theksohet në deklaratë. Në fund të njoftimit, Ambasada e SHBA-së ka përsëritur angazhimin se bashkëpunimi mes dy vendeve mbetet i palëkundur në fusha kyçe strategjike, ku spikat ekonomia, mbrojtja dhe siguria, ndërsa koordinimi si partnerë brenda Aleancës së Atlantikut Verior vazhdon të mbetet gur themeli për stabilitetin rajonal.