Bllokimi i AKI-së, Berisha bën thirrje urgjente për dialog mes partive: Të shmangim zgjedhjet e reja

Kryetari i Komisionit për Mbikëqyrjen e Agjencisë së Kosovës për Inteligjencë (AKI), Bekë Berisha, ka konfirmuar se mbledhja e këtij mekanizmi parlamentar është mbajtur me kuorumin e nevojshëm dhe puna do të vijojë rregullisht, pavarësisht largimit të deputetëve nga radhët e Partisë Demokratike të Kosovës (PDK). Në një prononcim pas mbledhjes, Berisha bëri të ditur se kuorumi ishte i plotë, ndonëse mungonte një përfaqësues i Listës Serbe. Ai vlerësoi se shqetësimet e ngritura nga opozita përbëjnë një çështje me interes të gjerë për të gjithë legjislativin dhe nuk duhet të ngushtohen vetëm brenda kornizave të një subjekti të vetëm politik. “Ishim në komision për mbikëqyrjen e Agjencisë së Kosovës për Inteligjencë, kuorum kishte në mungesë të një personi nga Lista Serbe. Edhe do të vazhdojmë punën, po patëm reagim nga deputetët e PDK-së ashtu qysh e shpjeguan ata. Kjo çështje nuk është veç e një partie, është e të gjithëve. Edhe i kisha lutë të gjithë deputetët e Kuvendit të Kosovës, me dhanë kontributin e vet më së pari që ne të stabilizuhemi e të kemi komisione të rregullta, po edhe të kemi parlament e të mund të debatojmë”, deklaroi Berisha. Duke analizuar kontekstin aktual politik, kreu i komisionit paralajmëroi se vendi po ballafaqohet me një situatë mjaft të ndjeshme, duke u bërë thirrje parlamentarëve që të angazhohen maksimalisht për zhbllokimin e ngërçit institucional. Sipas tij, Kuvendit i kanë mbetur vetëm edhe pak ditë nga mandati i rregullt, ndërsa ekziston rreziku real që mungesa e dialogut ndërpartiak ta rikthejë Kosovën sërish në ciklin e zgjedhjeve të parakohshme. “Duhet me ditë që jemi me afat edhe 4-5 ditë, domethënë kemi mandat nëse nuk shkojmë në zgjedhje. Sikur jemi mësu, domethënë jemi që tri herë tu shku në zgjedhje, ka mundësi që shkojmë prapë për shkak të moskomunikimit të mirëfilltë, për shkak të mosinteresimit, për shkak se po na marrin, domethënë temat edhe gjërat po na shtyjnë përpara e pa rolin shumë të deputetëve. Edhe çdo deputet e ka për detyrë, e ka për obligim, sepse nuk ka tjetër kush këtu pos deputetëve të të gjitha partive politike për me kallëzu qysh me dalë na prej këtij ngërçi e prej kësaj nyje”, u shpreh ai. Berisha theksoi gjithashtu se ngjarjet e fundit kanë sjellë një kthesë të rëndësishme në realitetin e vendit, andaj qasja ndaj sfidave aktuale nuk duhet reduktuar vetëm në aspektin e organizatave apo individëve të caktuar, por duhet parë në funksion të fatit dhe të ardhmes së Kosovës. “Kosova më nuk është e njëjtë prej datës 16, prej asaj që ka ndodhë. Nuk ka të bëjë këtu as veç me një organizatë, as me katër ose me gjashtë individë, ka të bëjë me fatin e Kosovës. Edhe këtyre tash na duhet me u ulë edhe duhet me ja nisë me këqyrë qysh me dalë me zgjidhje. Nuk mundet me pru kush zgjedhje për neve, se duhet na tash me ja nisë”, shtoi ai. Kryetari i komisionit vlerësoi se institucionet vendase duhet të dëshmojnë pjekuri dhe të marrin përgjegjësinë e plotë për menaxhimin e krizës, duke bërë një krahasim me praktikat e kaluara kur mbështetja apo udhëzimet kërkoheshin te misionet ndërkombëtare. “E mbaj mend një kohë, veç në ambasada na kallzonin çka me ba. Tani do të tjerë i mahnitëshin krejt ambasadat. Po tash na duhet me marrë rolin deputetët e Kuvendit të Kosovës, sepse nuk ka nevojë me ardhur kush, askush sot nuk u mor kush me çështjet tona. Kjo është gjendje e rëndë”, përfundoi Berisha. Në mbyllje të prononcimit të tij, ai përsëriti apelin drejtuar të gjitha subjekteve politike për intensifikimin e komunikimit, duke nënvizuar se përtej dallimeve, për gjetjen e një gjuhe të përbashkët nevojiten mbi të gjitha sinqeritet dhe atdhedashuri.