Samiti i integrimit në Tiranë / Begaj pret Von der Leyen: Synojmë mbylljen e kapitujve të BE-së deri në vitin 2027

Kreu i Shtetit, Bajram Begaj, zhvilloi ditën e sotme një takim zyrtar me Presidenten e Komisionit Evropian, Ursula von der Leyen. Në qendër të bisedimeve mes dy liderëve ishin e ecuria e deritanishme e procesit të integrimit evropian të vendit tonë, reformat rrënjësore dhe dinamikat e bashkëpunimit rajonal. Në fjalën e tij, Presidenti Begaj shprehu falënderimet e sinqerta për mbështetjen e vazhdueshme që Komisioni Evropian i jep Shqipërisë, duke riafirmuar se anëtarësimi në Bashkimin Evropian mbetet prioritet absolut dhe strategjik për kombin. Sipas tij, ky rrugëtim nuk është thjesht një procedurë burokratike, por një proces thellësisht transformues që ndikon drejtpërdrejt në konsolidimin e institucioneve, përsosjen e demokracisë dhe ngritjen e standardit të jetesës për qytetarët, ndërsa vuri në dukje hapat e sigurt që vendi ka hedhur në tryezën e negociatave. Rezultatet konkrete të kësaj faze tashmë janë të dukshme nëpërmjet nismave të suksesshme si Plani i Rritjes, integrimi në zonën SEPA dhe projekti 'EU4Schools'. “Shqipëria i qaset këtij procesi me besim, por edhe me një kuptim të qartë të përgjegjësisë që ai mbart. Ambicia jonë është të ruajmë ritmin dhe të vazhdojmë përparimin drejt mbylljes së të gjithë kapitujve deri në fund të vitit 2027”, – theksoi Presidenti Begaj gjatë bashkëbisedimit. Gjatë këtij takimi, Kreu i Shtetit vuri theksin te domosdoshmëria e respektimit të shtetit të së drejtës, avancimit të pandalur të reformës në drejtësi dhe forcimit të jetës demokratike në vend, duke ritheksuar qëndrimin se procesi i anëtarësimit duhet të udhëhiqet parimisht nga parimi i meritokracisë dhe arritjeve faktike në terren. “Ne besojmë, – u shpreh Presidenti Begaj, – se e vetmja rrugë e qëndrueshme është ajo e reformave konkrete. Jo vëtëm të bëjmë ligje, por të rrisim standardet sipas atyre evropiane dhe t’i vëmë në zbatim”. Në mbyllje të takimit, Presidenti rikonfirmoi përkushtimin e palëkundur të Shqipërisë për të ecur përpara me seriozitet në këtë rrugë, duke dhënë njëkohësisht kontributin e saj të çmuar për paqen, sigurinë, stabilitetin dhe prosperitetin në rajon dhe më gjerë në kontinentin evropian.