Gucati jep paralajmërimin e fortë: Protesta masive dhe tenda para ekzekutivit nëse dështon ligji për Specialen

Kryetari i Organizatës së Veteranëve të Luftës së UÇK-së, Hysni Gucati, ka bërë të qartë se do të ndërmerren hapa të rinj radikalë nëse ekzekutivi kosovar dështon të miratojë ndryshimet e propozuara ligjore për Dhomat e Specializuara. Sipas kreut të OVL-UÇK-së, organizata nuk do të qëndrojë duarkryq përballë kësaj situate. Ai ka bërë me dije se gjatë fundjavës do të mbahen takime konsultative mes kryesisë, Këshillit Drejtues dhe përfaqësuesve të dy shoqatave të dala nga lufta, asaj të familjeve të dëshmorëve dhe të invalidëve, për të vendosur për hapat e ardhshëm. Gucati ka pohuar se opsioni i ngritjes së tendave para ndërtesës së Qeverisë së Kosovës është një nga mundësitë reale që po shqyrtohet seriozisht nga strukturat drejtuese, me qëllim që t'i bëhet presion institucioneve deri në reflektimin e tyre. Në lidhje me tubimin e paralajmëruar për 1 tetor në kryeqytet, Gucati e ka cilësuar atë si një protestë mbarëpopullore, duke iu drejtuar me një thirrje publike të gjithë veteranëve, invalidëve dhe familjarëve të dëshmorëve që të bashkohen masivisht. Ai ka shtuar se përgatitjet për këtë ngjarje kanë qenë intensive, ku gjatë dy javëve të kaluara janë mbajtur takime të njëpasnjëshme me synim mobilizimin e qytetarëve dhe garantimin e një pjesëmarrjeje sa më të gjerë në këtë revoltë qytetare.