Integrimi evropian në fokus, Begaj pret në takim kreun e KE-së: Synojmë mbylljen e kapitujve deri në vitin 2027

Kreu i Shtetit, Bajram Begaj, ka zhvilluar sot një takim zyrtar me Presidenten e Komisionit Evropian, Ursula von der Leyen. Në qendër të bisedimeve mes dy liderëve kanë qenë e ecuria e integrimit evropian të vendit, reformat e ndërmarra, si dhe zhvillimet rreth bashkëpunimit rajonal. Gjatë këtij takimi, Presidenti Begaj i ka shprehur zonjës Von der Leyen falënderimet e sinqerta për mbështetjen e vazhdueshme që i jepet Shqipërisë, duke ritheksuar se aspirata për t'u bërë pjesë e Bashkimit Evropian mbetet misioni kryesor strategjik i vendit. Duke e cilësuar rrugëtimin drejt BE-së si një mundësi thelbësore për konsolidimin e institucioneve, demokracisë dhe ngritjen e standardit të jetesës për qytetarët, Presidenti vuri në theks se vendi ka shënuar hapa para në tryezën e negociatave. Nisma të tilla si Plani i Rritjes, integrimi në zonën SEPA apo projekte si EU4Schools dëshmojnë qartë rezultatet konkrete të këtij bashkëpunimi. “Shqipëria i qaset këtij procesi me besim, por edhe me një kuptim të qartë të përgjegjësisë që ai mbart. Ambicia jonë është të ruajmë ritmin dhe të vazhdojmë përparimin drejt mbylljes së të gjithë kapitujve deri në fund të vitit 2027”, – u shpreh Presidenti Begaj, duke shtuar se shteti ligjor, reforma në drejtësi dhe forcimi i demokracisë mbeten shtyllat kryesore të kësaj axhende. Kreu i Republikës rikonfirmoi gjithashtu se procesi i anëtarësimit duhet të mbështetet te meritokracia dhe puna e bërë në terren. “Ne besojmë se e vetmja rrugë e qëndrueshme është ajo e reformave konkrete. Jo vetëm të bëjmë ligje, por të rrisim standardet sipas atyre evropiane dhe t’i vëmë në zbatim”, – theksoi ai. Në përfundim të takimit, Presidenti Begaj përsëriti vendosmërinë e Shqipërisë për të ecur përpara në këtë rrugë me seriozitet dhe përkushtim maksimal, duke u shprehur se vendi do të vazhdojë të japë kontributin e tij për paqen, stabilitetin dhe sigurinë në rajon dhe më gjerë.