Situatë alarmante te Suedia para sfidës me Bosnjë-Hercegovinën, tre lojtarë izolohen për shkak sëmundjeje

Kombëtarja e Suedisë është përfshirë nga problemet shëndetësore në prag të duelit të rëndësishëm në Ligën e Kombeve kundër Bosnjë-Hercegovinës, teksa kanë mbetur vetëm dy ditë deri në këtë përballje. Në seancën stërvitore të zhvilluar të mërkurën në Bosön, skuadra suedeze është detyruar të stërvitet pa tre futbollistë të rëndësishëm, të cilët kanë shfaqur shenja të ftohjes dhe janë ndarë menjëherë nga grupi kryesor. Bëhet fjalë për Yasin Ayari, Benjamin Nygren dhe Gustaf Lagerbielke, prania e të cilëve në fushë u pamundësua për shkak të gjendjes së tyre shëndetësore, fakt ky i konfirmuar zyrtarisht nga stafi i përfaqësueses suedeze. Stafi drejtues ka ndërmarrë hapa të menjëhershëm për të shmangur çdo rrezik të mundshëm të transmetimit të virusit te pjesa tjetër e grupit, duke aplikuar masa të rrepta parandaluese. Lidhur me këtë situatë, zëdhënësja e përfaqësueses së Suedisë, Petra Thoren, ka dhënë detaje për mediat, duke konfirmuar shqetësimet rreth gjendjes së lojtarëve. “Ata kanë simptoma të ftohjes”, ka u shpreh Thoren, e cila shtoi se masat e izolimit janë zbatuar në mënyrë rigoroze: “Nuk janë me ekipin dhe po i mbajmë në izolim. Po marrim masat e nevojshme.” Për momentin, pjesëmarrja e Ayari, Nygren dhe Lagerbielke në udhëtimin drejt Bosnjë-Hercegovinës mbetet në pikëpyetje të madhe, ndërsa vendimi përfundimtar pritet të merret në varësi të ecurisë së gjendjes së tyre shëndetësore.