Mustafa paralajmëron ndryshimin e ligjit për Dhomat e Specializuara: Mund të miratohet para 6 tetorit

Deputeti i Partisë Demokratike të Kosovës, Rrustem Mustafa, ka shprehur bindjen e tij se nisma për ndryshimin e ligjit që rregullon Dhomat e Specializuara mund të finalizohet ende pa u bere data 6 tetor. Gjatë një paraqitjeje televizive në emisionin “Mesditë” në Tëvë1, ai theksoi domosdoshmërinë e veprimit urgjent institucional. “Ne duhet të vazhdojmë procedimin e ligjit për të cilin jemi marrë vesh dhe që tani është në Qeveri, në tavolinën e zotit Kurti. Prioritet në vendin tonë është t’i përgjigjemi sulmit të orkestruar të bllokut të keq mbi mekanizmat dhe institucionet e vendit tonë. Unë e di që mund të bëhet edhe para datës gjashtë, edhe kryeministri po ashtu u shpreh”, u deklarua Mustafa gjatë intervistës. I pyetur nëse ekzistojnë indikacione inkurajuese nga ana e kreut të ekzekutivit për këtë çështje, deputeti i PDK-së konfirmoi se ka sinjale pozitive. Në vazhdim të bisedës, ligjvënësi demokrat ndau detaje nga një takim i zhvilluar me kryeministrin Albin Kurti në periudhën para 16 shtatorit. “Komunikimi që kam pasur me zotin Kurti ka qenë para 16 shtatorit. Ka qenë i mirë, gjë që kemi folur për bashkëpunimin institucional mes Partisë Demokratike dhe Vetëvendosjes, dhe unë e di që ka mundësi të shumta”, shtoi ai më tej. Në fund, Mustafa nënvizoi se optimizmi i tij mbështetet edhe te miratimi i deklaratës së përbashkët lidhur me aktgjykimin dënues të shpallur në Hagë.