Ramush Haradinaj bën thirrje urgjente: Të gjithë në shesh nesër kundër vendimit për krerët e UÇK-së

Ish-kryeministri i Kosovës, Ramush Haradinaj, u ka bërë thirrje qytetarëve që të bashkohen masivisht në protestën e cila do të zhvillohet nesër në Prishtinë. Kjo protestë organiozohet si reagim i hapur ndaj vendimit dënues të shpallur ndaj ish-udhëheqësve të Ushtrisë Çlirimtare të Kosovës (UÇK). Tubimi protestues është planifikuar të nisë në orën 16:00 dhe do të mbahet në sheshin kryesor të kryeqytetit. Nëpërmjet një deklarate publike, Haradinaj ka ftuar popullsinë që të bëhet pjesë e kësaj nisme, duke e cilësuar aktin e gjykatës ndaj ish-krerëve të UÇK-së si një vendim thellësisht të padrejtë dhe krejtësisht të papranueshëm. "Vendimi dënues ndaj udhëheqësve të UÇK-së është i papranueshëm dhe i padrejtë", ka theksuar ai në mesazhin e tij. Duke shprehur pakënaqësinë e tij të thellë, ai e ka përmbyllur thirrjen me moton: “Jo në emrin tim, jo në emër të popullit të Kosovës”. “Duke mbrojtur luftën e drejtë çlirimtare, mbrojmë atdheun”, ka përfunduar deklaratën e tij ish-kryeministri Haradinaj.