Rasti i jashtëzakonshëm në Britani: 5-vjeçares i nisi puberteti që në moshën 10-muajshe, nëna shqyrton ngrirjen e vezëve

Një histori e rrallë dhe e dhimbshme nga Britania e Madhe ka vënë në lëvizje një nënë, e cila tashmë po mendon seriozisht për të ardhmen riprodhuese të së bijës, pasi kjo e fundit shfaqi shenjat e para të pubertetit kur ishte vetëm 10 muajshe. Sienna, e cila sot është 5 vjeçe, u diagnostikua me pubertet qendror të parakohshëm (CPP). Kjo është një gjendje mjaft e rrallë ku truri dërgon sinjale hormonale shumë herët, duke aktivizuar procesin e zhvillimit trupor para kohe. Nëna e saj, 41-vjeçarja Sophie Dumas nga Londra, fillimisht nuk kishte vërejtur asgjë të pazakontë te foshnja. Dyshimet e para lindën gjatë një kontrolli rutinë me infermieren e shëndetit, e cila konstatoi se indi i gjoksit të foshnjës ishte i zmadhuar. Pas këtij alarmi, Sienna u dërgua te mjekët specialistë dhe iu nënshtrua një sërë ekzaminimesh të vështira, të cilat nëna i cilëson si “jashtëzakonisht shqetësuese”. Këto përfshinin analiza hormonale, teste stimuluese, radiografi për të llogaritur moshën e kockave dhe një rezonancë magnetike për të përjashtuar probleme të mundshme në tru. Rezultatet përfundimtare konfirmuan diagnozën. “Sienna ishte një bebe e lumtur dhe e shëndetshme”, shprehet Sophie, duke shtuar se në fillim nuk e kishte lidhur pamjen e vajzës me ndonjë çrregullim hormonal. Procedurat e testimit ishduar veçanërisht traumatike; foshnja u stresua aq shumë sa njëra nga venat e saj u kolapsua, duke detyruar mjekët t'i merrnin gjak nga thembrat, ndërsa nëna përpiqej ta qetësonte duke e ushqyer me gji. Për të frenuar këtë zhvillim, e vogla nisi menjëherë trajtimin mjekësor me injeksione të analogëve të GnRH. Këto barna bllokojnë përkohësisht hormonet e pubertetit dhe jepen çdo katër javë, një terapi që parashikohet të vazhdojë deri rreth moshës 11 ose 12 vjeç, në varësi të ecurisë së saj. Rezonanca magnetike nuk gjeti asnjë shkak të qartë në tru, një dukuri e zakonshme në rastet e pubertetit qendror të parakohshëm te vajzat. Edhe pse kjo gjendje nuk kërcënon jetën, ajo mund të ndikojë në shtatin përfundimtar të fëmijës për shkak të rritjes së përshpejtuar dhe pjekjes së parakohshme të pllakave të kockave. Megjithatë, për Sophie, sfida më e madhe nuk mbetet vetëm te aspekti fizik. Ajo ka frikë se vajza mund të përballet me paragjykime, bullizëm dhe ngarkesa emocionale. Së fundmi, fëmijët e tjerë në klasë kanë nisur të bëjnë komente për puçrrat hormonale në fytyrën e Siennës, duke menduar gabimisht se ajo ishte prekur nga lisja e dhenve. Sienna ende nuk e kupton plotësisht pse dallon nga bashkëmoshatarët e saj. “Më dhemb shumë si nënë. Askush nuk dëshiron ta shohë fëmijën e vet të mërzitur për shkak të fjalëve të të tjerëve”, rrëfen Sophie. Në sfondin e këtyre shqetësimeve, nëna po mendon edhe për një çështje afatgjatë: fertilitetin e së bijës në të ardhmen. 41-vjeçarja po shqyrton mundësinë e ngrirjes së vezëve të Siennës, në mënyrë që ajo të ketë mundësi zgjedhjeje kur të rritet, nëse do të dëshirojë të krijojë familje. “Kur u diagnostikua, u shqetësova se ndoshta një ditë nuk do të mund të bënte fëmijë dhe se kjo e drejtë do t’i mohohej”, shton ajo. Kjo ide po diskutohet me mjekët, ndonëse nuk do të thotë domosdoshmërisht se Sienna do të ketë probleme me fertilitetin në të ardhmen, me shpresën se trajtimi do të parandalojë çdo komplikim.