Gjykata Speciale kërkon gjashtë vjet shtesë për Hashim Thaçin, pa llogaritur kohën e paraburgimit

Zyra e Prokurorisë së Specializuar (ZPS) në Hagë ka ndërmarrë një hap të ri ligjor për ashpërsimin e pozitës procedurale të ish-Presidentit të Kosovës, Hashim Thaçi. Në dosjen e saj përfundimtare për rastin “12” që lidhet me akuzat për pengim të drejtësisë, akuza ka kërkuar që periudha e kaluar në paraburgim të mos i llogaritet atij në këtë proces, por t'i adresohet ekskluzivisht rastit “06”, ku ai më parë është dënuar me 25 vjet heqje lirie. Sipas shpjegimeve të dhëna në dokumentin e akuzës, ndonëse Rregulla 163(6) u garanton të gjithë të pandehurve të drejtën e njohjes së kohës së kaluar në paraburgim para shqiptimit të dënimit, situata e Thaçit është specifike pasi ai mbahet nën masën e sigurisë në bazë të dy urdhër-arresteve të ndara: që nga nëntori i vitit 2020 në Çështjen 6 dhe nga nëntori i vitit 2024 në procedurat aktuale. Prokuroria arsyeton se praktika e ngjashme e aplikuar në tribunale të tjera ndërkombëtare tregon se një qasje e tillë është standarde kur bëhet fjalë për vepra penale të ndara. Duke iu referuar rastit të njohur nga Dhoma e Apelit në çështjen Bemba et al., ZPS thekson se kur një person privohet nga liria në bazë të urdhër-arresteve në çështje të ndryshme, koha e kaluar në paraburgim mund të llogaritet vetëm një herë. Organi i ndjekjes penale vlerëson se kjo metodologji është vendimtare për të siguruar efektin parandalues të ligjit, në mënyrë që të pandehurit të mos kenë hapësirë të përfshihen në veprime penguese duke menduar se ditët e paraburgimit do t'u zbriten njëkohësisht nga të gjitha dënimet. Për rrjedhojë, prokurorët kanë kërkuar zyrtarisht nga gjyqtari kompetent në çështjen “12” që çdo lloj kreditimi për kohën e kaluar në paraburgim gjatë këtyre procedurave të mos preket, por të zbritet vetëm nga dënimi i përcaktuar në çështjen kryesore. Krahas kësaj kërese për llogaritjen e paraburgimit, Prokuroria e Speciales ka kërkuar një dënim shtesë prej gjashtë vitesh burg për ish-kreun e shtetit në rastin “12”. Nëse kërkesa e ZPS-së miratohet plotësisht nga gjykata, kjo masë do t'i shtohej dënimit prej 25 vitesh nga çështja “06”, duke e çuar totalin e mundshëm të dënimit të Hashim Thaçit në Gjykatën Speciale në 31 vjet heqje lirie. Në të njëjtën dosje dhe për të njëjtat pretendime, Prokuroria ka kërkuar dënime edhe për të pandehurit e tjerë të përfshirë në këtë procedurë: nga tri vjet burg për Bashkim Smakajn, Isni Kilajn dhe Fadil Fazliun, si dhe nëntë muaj burg për Hajredin Kuçin.