Gjakova bëhet pjesë e elitës botërore: Qyteti historik pranohet në Ligën e Qyteteve Historike

Gjakova ka shënuar një sukses të rëndësishëm ndërkombëtar, duke u pranuar zyrtarisht si anëtare e Ligës së Qyteteve Historike të Botës. Ky vendim u zyrtarizua në kuadër të punimeve të Konferencës së 20-të Botërore të Qyteteve Historike, e cila u zhvillua në qytetin Himeji të Japonisë. Delegacioni i Komunës së Gjakovës, i prirë nga kryetari Ardian Gjini, së bashku me drejtoreshën për Kulturë, Rini dhe Sport, Nita Efendia Brovina, dhe udhëheqësen e Sektorit të Integrimeve Evropiane, Adea Hasi, përfaqësuan denjësisht qytetin në këtë ngjarje të rëndësishme globale. Sipas njoftimit zyrtar, kryetari Gjini pati mundësinë të shpalosë para të pranishmëve vlerat e pasura historike, trashëgiminë kulturore dhe traditën e njohur të mikpritjes gjakovare. Në kuadër të këtij organizimi, delegacioni mori pjesë edhe në Asamblenë e Përgjithshme, ku u finalizua nënshkrimi i Deklaratës së Himejit. Pas përfundimit të aktiviteteve në Himeji, përfaqësuesit nga Gjakova vizituan edhe qytetin e Kyotos. Në një darkë zyrtare të organizuar nga kryetari i këtij qyteti, Ardian Gjini pati nderin të mbajë fjalën përmbyllëse në emër të të gjitha delegacioneve pjesëmarrëse. Ky anëtarësim shihet si një mundësi strategjike për Gjakovën, pasi hap dyer të reja për promovimin e turizmit, shkëmbimet kulturore dhe zhvillimin ekonomik. Njëkohësisht, ky hap vlerësohet si një kontribut domethënës për forcimin e përfaqësimit dhe imazhit të Kosovës në arenën ndërkombëtare.