Hoxha kritikon ashpër PDK-në: Po humbni shansin e fundit për të vënë në pozicion të vështirë Vetëvendosjen

Analisti politik, Dibran Hoxha, ka drejtuar kritika të ashpra ndaj Partisë Demokratike të Kosovës (PDK) për shkak të qëndrimit të saj të lëkundur rreth ndryshimeve në ligjin për Dhomat e Specializuara dhe procesit të zgjedhjes së presidentit të ri të vendit. Sipas Hoxhës, PDK-ja e ka të domosdoshme të mbajë një qëndrim të prerë dhe të qartë strategjik. Ai ka propozuar një formulë konkrete: partia duhet të kushtëzojë votimin e ndryshimeve ligjore për Gjykatën Speciale me mbështetjen për zgjedhjen e Glauk Konjufcës në postin e presidentit. Analisti e konsideron të gabuar qasjen aktuale të PDK-së, duke theksuar se deklaratat e tyre për të votuar fillimisht ndryshimet ligjore e më pas për të biseduar për presidentin nuk përfaqësojnë një qëndrim serioz politik. Ai kujton se subjektet politike po 'bisedojnë' për këtë post tash e dy vjet pa ndonjë rezultat. Hoxha paralajmëron se, pas një krize institucionale që zgjat prej dy vitesh, PDK-ja po lëshon nga duart të vetmen mundësi për ta vendosur Lëvizjen Vetëvendosje në një pozitë të vështirë presioni. Ai ka ngritur dyshime të forta mbi seriozitetin e bisedimeve të zvarritura, duke pyetur se si pretendohet të arrihet një marrëveshje për kreun e shtetit në vetëm shtatë ditët e mbetura të afatit.