Tragjedi në Pezë: 16-vjeçari humb jetën pasi mori makinën e të atit pa leje

Një ngjarje e rëndë ka tronditur zonën e Pezës mbrëmjen e së martës, ku një aksident fatal i ka marrë jetën një adoleshenti. Viktima, 16 vjeç, ka ndërruar jetë si pasojë e përplasjes së rëndë, ndërsa shoku i tij 15-vjeçar, i cili ndodhej në automjet, ka mbetur i plagosur. Sipas informacioneve paraprake, dyshohet se i mituri kishte marrë automjetin e të atit fshehurazi, pa dijeninë e familjarëve. Gjatë drejtimit të mjetit, ai dyshohet se ka humbur kontrollin mbi timon, duke bërë që makina të dalë nga rruga dhe të përfundojë në një kanal. Goditja ka rezultuar fatale për 16-vjeçarin, i cili nuk ka mundur t’u mbijetojë plagëve të marra. Ndërkohë, bashkëmoshatari i tij është dërguar menjëherë në spital për të marrë kujdesin e nevojshëm mjekësor dhe fatmirësisht ndodhet jashtë rrezikut për jetën. Grupi hetimor ndodhet në vendngjarje dhe po punon intensivisht për të sqaruar të gjitha rrethanat dhe dinamikën e plotë të këtij aksidenti tragjik.