Sport
Kombëtarja e Kosovës U17 në hendboll nis përgatitjet për sfidat kualifikuese drejt Euro 2027
Reklamë e Sponsorizuar
Vashat e Kombëtares U17 të Kosovës në hendboll do të mblidhen të dielën në qytetin e Ferizajt, ku do të zhvillojnë fazën përgatitore në funksion të ndeshjeve kualifikuese për Kampionatin Evropian 2027.
Shtabi teknik, i udhëhequr nga kryetrajneri Faruk Shala, ka zyrtarizuar gjatë ditës së premte listën e hendbollisteve të ftuara për këtë grumbullim, ku bëjnë pjesë kryesisht lojtare që aktivizohen në kampionatin vendor. Për këtë gjeneratë, ky nuk është aktiviteti i parë, pasi ato kanë pasur edhe më parë disa sesione stërvitore dhe eksperienca në arenën ndërkombëtare.
Në kuadër të fazës kualifikuese, Përfaqësuesja U17 e Kosovës është pozicionuar në Grupin B, ku do të ketë përballë kombëtaret e Maqedonisë së Veriut, Lituanisë dhe Greqisë. Ndeshjet e këtij grupi do të zhvillohen në Shkup nga 27 deri më 29 nëntor, ndërsa delegacioni kosovar do të udhëtojë drejt vendit fqinj më 26 nëntor.
Kualifikimet zhvillohen në katër grupe, prej të cilave dy skuadrat e para të secilit grup do të sigurojnë biletën për në Evropian, sukses që do t'i takojë gjithashtu edhe kombëtares më të mirë të vendit të tretë nga të gjitha grupet.
Reklamë e Sponsorizuar
Ky artikull është përgatitur dhe verifikuar nga redaksia e Lajmet e Reja. Të gjitha të drejtat janë të rezervuara.
Reklamë e Sponsorizuar
Shpërndaj këtë lajm: