Sport
Superliga e Kosovës në basketboll: Përplasje spektakolare mes kampionit dhe nënkampionit këtë fundjavë
Reklamë e Sponsorizuar
ProCredit Superliga e Kosovës në basketboll do të dhurojë emocione të forta gjatë kësaj fundjavë, ku do të zhvillohen katër takimet e vlefshme për javën e dhjetë, të cilat premtojnë rivalitet të lartë në parket.
Ndeshjet e ditës së shtunë do të hapen në orën 17:00, me sfidën ndërmjet Golden Eagle Yllit dhe Sigal Prishtinës, dy skuadra që synojnë vetëm triumfin në këtë përballje që pritet të ndezë atmosferën.
Më pas, duke nisur nga ora 19:30, Rahoveci 029 do të presë në shtëpinë e tij skuadrën e Borës, në një takim ku mysafirët nga kryeqyteti hynë si favoritë në letër.
Të dielën, sytë e sportdashësve do të jenë të drejtuar nga Mitrovica, ku nga ora 17:00 Trepça do të masë forcat me Bashkimin. Kjo sfidë vë përballë dy emra të njohur që po e mbrojnë fanellën e basketbollit kosovar edhe në garat ndërkombëtare evropiane.
Interesi për këtë duel është tejet i lartë, pasi përplasen kampioni dhe nënkampioni aktual. Këto dy ekipe kanë dhuruar rivalitet të fortë edhe më parë, përfshirë finalet e Kupës dhe Superkupës. Gjatë edicionit të kaluar, mitrovicasit ngritën lart titullin dhe Kupën, ndërsa prizrenasit morën trofeun e Superkupës.
Java e dhjetë e elitës së basketbollit do të ulë siparin të dielën mbrëma, me ndeshjen ndërmjet Vëllaznimit dhe Pejës, e cila do të nisë në orën 19:30 dhe premton luftë të pandërprerë për pikët e radhës.
Reklamë e Sponsorizuar
Ky artikull është përgatitur dhe verifikuar nga redaksia e Lajmet e Reja. Të gjitha të drejtat janë të rezervuara.
Reklamë e Sponsorizuar
Shpërndaj këtë lajm: