Qendra “Gjenocidi në Kosovë” kërkon reagim urgjent institucional: Të zhbëhen Dhomat e Specializuara

Qendra “Gjenocidi në Kosovë – Plagë e Hapur” i është drejtuar me një letër zyrtare krerëve më të lartë të shtetit dhe përfaqësuesve politikë, përmes së cilës ka kërkuar ndërmarrjen e hapave konkretë, përfshirë shpalljen e gjendjes së jashtëzakonshme dhe shfuqizimin e Dhomave të Specializuara të Kosovës dhe Zyrës së Prokurorit të Specializuar. Letra, e adresuar për ushtruesen e detyrës së Presidentit, kryetaren e Kuvendit, kryeministrin Albin Kurti, si dhe krerët e partive politike e deputetët, ngre alarmin për atë që kjo organizatë e konsideron si kërcënim serioz ndaj pavarësisë së vendit. Sipas tyre, vendimi i 16 shtatorit i marrë nga Gjykata Speciale përbën një shkelje të rëndë të parimeve themelore të Kushtetutës së Republikës së Kosovës. Kjo Qendër pretendon se interpretimet e Speciales për shpalljen e pavarësisë së Kosovës bien ndesh me të vërtetën historike të luftës për liri. Ata përkujtojnë deklaratën e 28 shtatorit, të nënshkruar nga 99 deputetë të Kuvendit, përmes së cilës institucionet obligohen të mbrojnë pastërtinë e luftës së Ushtrisë Çlirimtare të Kosovës dhe të ndërtojnë një strategji unike shtetërore. Një shqetësim i veçantë është shprehur lidhur me përbërjen e Panelit të Apelit, i caktuar më 29 shtator për të shqyrtuar rastet e Hashim Thaçit, Jakup Krasniqit, Kadri Veselit dhe Rexhep Selimit. Sipas Qendrës, fakti që në këtë panel bëjnë pjesë gjyqtarë që kanë shërbyer në procese të mëparshme ndaj Hysni Gucatit, Nasim Haradinajt, Salih Mustafës dhe Pjetër Shalës, krijon bindjen se vendimi i ardhshëm është i paragjykuar, duke e përshkruar situatën si një rast tipik “DÉJÀ VU”. Si zgjidhje për këtë rrethanë, organizata kërkon trajtimin e menjëhershëm të abrogimit të nenit 162 të Kushtetutës si një imperativ kategorik. Në qëndrimin e saj, vetëm zhbërja e plotë e institucioneve të specializuara mund ta mbrojë shtetin nga rreziqet që i kanosen. Në përmbyllje, Qendra u bën thirrje forcave politike që të ruajnë frymën e konsensusit të arritur në deklaratën e 28 shtatorit. Ata besojnë se një unitet i tillë politik është thelbësor për të minimizuar tensionet e brendshme dhe për të forcuar qëndrueshmërinë e shoqërisë përballë presionit të vazhdueshëm ndërkombëtar.