Kronikë
Tragjedia në Suharekë: Prokuroria kërkon paraburgim për Rrahman Hotin pas vrasjes së Sylë Dakajt
Reklamë e Sponsorizuar
Prokuroria Themelore në Prizren, konkretisht Departamenti i Krimeve të Rënda, i ka drejtuar kërkesë Gjykatës Themelore për caktimin e masës së paraburgimit ndaj Rrahman Hotit. Ky i fundit dyshohet për kryerjen e veprave penale të vrasjes së rëndë dhe mbajtjes në pronësi, kontroll apo posedim të paautorizuar të armëve.
Ngjarja e rëndë ndodhi më 18 nëntor 2026, rreth orës 12:03, në parkingun e një qendre tregtare në Suharekë. Sipas hetimeve, pas një konflikti të çastit për çështje parkimi, i dyshuari Hoti privoi nga jeta me dashje Sylë Dakajn, duke vënë në rrezik serioz edhe jetën e bashkëshortes së viktimës dhe vajzës së tyre të mitur.
Detajet e dosjes tregojnë se i pandehuri ka shkrepur armën e zjarrit të tipit “Sig Sauer” në drejtim të viktimës, fillimisht përmes xhamit të mjetit, e më pas duke vazhduar të shtënat edhe pasi ka hapur derën e automjetit, duke e goditur Dakajn në pjesë të ndryshme të trupit.
Pas plagosjes, viktima mori ndihmën e parë në QKMF-në e Suharekës dhe u dërgua me urgjencë në Spitalin Rajonal të Prizrenit, mirëpo përpjekjet e mjekëve ishin të pasuksesshme, pasi ai ndërroi jetë si pasojë e plagëve të rënda.
Ndonëse pas ngjarjes i dyshuari u largua nga vendi i krimit, Policia e Kosovës arriti ta lokalizojë dhe ta arrestojë atë shpejt. Gjatë kontrollit, në automjetin e tij u gjet arma e përdorur, dy karikatorë dhe 24 fishekë, ndërsa në banesën e të dyshuarit u sekuestruan edhe 47 fishekë të tjerë.
Nga verifikimet e kryera, rezulton se Rrahman Hoti nuk është një emër i panjohur për drejtësinë, pasi ai është dënuar më parë nga autoritetet zvicerane për veprën penale të vrasjes.
Reklamë e Sponsorizuar
Ky artikull është përgatitur dhe verifikuar nga redaksia e Lajmet e Reja. Të gjitha të drejtat janë të rezervuara.
Reklamë e Sponsorizuar
Shpërndaj këtë lajm: