Sport
Skema e re e sponsorizimit në sport e kulturë: Kufijtë financiarë dhe institucionet që mbeten jashtë
Reklamë e Sponsorizuar
Ministri i Turizmit, Kulturës dhe Sportit, Blendi Gonxhja, ka bërë publike detajet kyçe lidhur me “Projektligjin e Sponsorizimit” dhe aplikimin e mekanizmave të rinj fiskalë, të cilët pritet të hyjnë në fuqi nga viti 2027. Sipas parashikimeve, shuma maksimale që një sponsor i vetëm do të mund të japë brenda një viti është caktuar në 30 milionë lekë, ndërkohë që tavani i përgjithshëm kombëtar do të kapë shifrën e 2 miliardë lekëve.
Një nga risitë më të rëndësishme të kësaj nisme është mundësia që u krijohet bizneseve për t'u dhënë mbështetje financiare direkte sportistëve dhe krijuesve artistikë që mbajnë lart ngjyrat e Shqipërisë në aktivitetet ndërkombëtare.
Pjesë e këtij ndryshimi është edhe ngritja e “Regjistrit Elektronik Kombëtar të Sponsorizimeve”, administrata e të cilit do të mbulohet nga Drejtoria e Përgjithshme e Tatimeve. Kjo platformë do të shërbejë për evidentimin dhe gjurmimin e çdo kontributi financiar, pa pasur kufizim nga vlera e tij.
Për të shmangur çdo mundësi konflikti interesi apo ndërhyrjeje në vendimmarrjet publike, drafti ligjor vendos filtra të rreptë. Ai ndalon marrjen e donacioneve nga institucionet e drejtësisë, Policia e Shtetit, si dhe entet që ushtrojnë funksione kontrolluese dhe mbikëqyrëse. Gjithashtu, ligji përjashton kategorikisht individët që janë dënuar për vepra penale të korrupsionit, ndërsa financimet anonime ndalohen me ligj.
“Me këtë projektligj bëjmë një kapërcim konceptual, kalojmë nga modeli i bamirësisë së izoluar drejt një partneriteti strategjik ndërmjet shtetit, biznesit dhe shoqërisë, ku krijohet vlerë e përbashkët ekonomike dhe sociale. Buxheti i shtetit mbetet një instrument themelor, por fondet publike dhe thirrjet vjetore nuk janë më burimi i vetëm për të mbuluar nevojat dhe ambiciet për zhvillim”, deklaroi ministri Gonxhja.
Reklamë e Sponsorizuar
Ky artikull është përgatitur dhe verifikuar nga redaksia e Lajmet e Reja. Të gjitha të drejtat janë të rezervuara.
Reklamë e Sponsorizuar
Shpërndaj këtë lajm: