“Projektligji është mbi tavolinë, çfarë po prisni?” – Thirrja e ashpër e Çlirim Hazirit drejtuar Albin Kurtit

Organizatori i tubimit “Jo në emrin tim”, Çlirim Haziri, i ka bërë thirrje kryeministrit Albin Kurti që ekzekutivi ta përcjellë në Kuvend nismën ligjore për ndryshimin dhe plotësimin e Ligjit për Dhomat e Specializuara. Gjatë natës së 14-të të protestës, ai theksoi se miratimi i deklaratës nga 99 ligjvënës nuk mjafton për t'i dhënë fund kërkesave të qytetarëve, nëse ajo nuk shoqërohet me ndryshime konkrete ligjore. Fjalimin e tij, Haziri e nisi duke u shprehur mirënjohje qytetarëve që, pavarësisht dy javëve të plota, vazhdojnë të mblidhen çdo mbrëmje në shesh. “E di që pas një dite të gjatë, me hallet e punës, me fëmijët, me përditshmërinë dhe barrën që e ka secili prej nesh, më e lehta do të ishte të rrinim në shtëpi. Por ja ku jemi! Prapë bashkë. Prapë këtu. Duke lënë çdo rehati e çdo interes personal anash për t’i dalë zot dinjitetit të këtij vendi”, u shpreh ai. Sipas tij, protesta jo vetëm që nuk po zbehet, por energjia e saj po rritet çdo ditë. “Vetëm shikojeni njëri-tjetrin në sy: këtu nuk ka plogështi! Në këtë shesh ka vetëm një gjë që po zien çdo ditë e më shumë: këtu po soset durimi! Nuk po rritet lodhja, por po soset durimi”, shtoi Haziri. Duke iu referuar dokumentit të votuar në Kuvend, ai theksoi se tashmë ka marrë fund koha e shmangies së përgjegjësisë institucionale. “Deri dje luanin ping-pong me përgjegjësinë shtetërore. Na shisnin mjegull e na thoshin: ‘Prisni Kuvendin, se pa folur Kuvendi nuk mund të bëjmë asgjë’. Epo Kuvendi e bëri lëvizjen e vet. 99 deputetë të të gjitha partive e votuan atë deklaratën e famshme”, u shpreh ai. Megjithatë, ai e cilësoi këtë deklaratë si të pamjaftueshme pa hapa konkretë legjislativë. “Janë fjalë të radhitura bukur në një letër sa për të thënë: ‘Ja, ne e bëmë tonën, lajini duart’. Zero pasoja juridike. Zero! Kjo deklaratë, pa ligjin prapa saj, është fiks me na ushqy me lugë të thatched”, deklaroi Haziri. “Kosova nuk është kullë e ndërtuar me letra. Kosova është kullë e mundit, djersës, sakrificës e gjakut. Kulla mbahet me vepra, e shteti mbahet me ligje! Jo me deklarata”, shtoi ai. Më tej, organizatori kërkoi nga deputetët që mbështetjen e dhënë në letër ta konfirmojnë edhe në momentin e votimit të projektligjit. “Nëse dje 99 duar u ngritën aq kollaj për një letër që askujt nuk ia prish terezinë, sa nga ato duar do të ngrihen kur ligji të vijë në rend të ditës? A do t’u dridhet dora atëherë, vai do të fshihen nën tavolinë?”, pyeti ai. Haziri bëri të ditur se fokusi i protestuesve tashmë është te Qeveria, ku sipas tij gjendet projektligji, duke shtuar se për momentin nuk po e akuzojnë ekzekutivin për bllokim, por janë në pritje të veprimeve. “Ne nuk po dalim sonte të bërtasim e të themi se e keni bllokuar e që nuk po doni ta votoni. Kjo mbetet të shihet. Ne po presim. Nuk kemi dhënë verdikt. Jemi duke ju matë”, u shpreh ai. Në fund, ai iu drejtua drejtpërdrejt kryeministrit Albin Kurti: “Kryeministër, në atë tavolinë ti nuk e ke thjesht një projektligj! Nuk është udhëzim i rëndomtë administrativ. Nuk është rregullore e zakonshme. Atë që keni mbi tavolinë është dinjiteti i këtij shteti!” Duke paralajmëruar një pjesëmarrje edhe më të madhe në protestën e 1 tetorit, Haziri përfundoi: “Ne kemi trokitur me fjalë. Kemi pritur me durim. Por durimi, vëllezër dhe motra, ka arritur në kufi! Nëse mendoni se kjo revoltë mbyllet me një deklaratë fasadë, mbajeni mend mirë: Më 1 tetor, do ta kuptoni se çfarë force mban ky shesh!” “Më 1 tetor, zëri ynë nuk do të jetë më pritje — do të jetë lum njerëzish, një vërshim i vërtetë, një uragan i pandalshëm i këtij populli! Zgjidhja është në tavolinën tuaj. Veproni sa nuk është vonë!”