Kronikë
Tragjedi në autostradën Fier-Vlorë: Humb jetën Shefi i Krimeve të Rënda, Ermal Lulaj
Reklamë e Sponsorizuar
Një aksident fatal ka ndodhur pasditen e sotme në autostradën “100 Vjetori”, në aksin Fier-Vlorë, duke shkaktuar humbjen tragjike të jetës së shefit të Krimeve të Rënda në Drejtorinë Vendore të Policisë së Vlorës, Ermal Lulaj.
Ngjarja e rëndë është regjistruar në afërsi të zonës së Novoselës, rreth orës 18:00. Sipas të dhënave paraprake, automjeti tip “Toyota” që drejtohej nga efektivi i policisë, E.L., është përplasur me një mjet të tonazhit të rëndë (skrep), të cilin e drejtonte 63-vjeçari Thanas Poçaj. Dyshimet e para të autoriteteve sugjerojnë se kushtet e vështira atmosferike dhe humbja e kontrollit mbi mjetin kanë çuar në këtë përplasje fatale.
Si pasojë e impaktit të fortë, drejtuesi i automjetit, Ermal Lulaj, ka ndërruar jetë në vendngjarje. Ndërkohë, drejtuesi i mjetit tjetër, Thanas Poçaj, ka mbetur i plagosur dhe është transportuar me urgjencë drejt Spitalit Rajonal të Vlorës për të marrë ndihmën e nevojshme mjekësore.
Forca të shumta të Policisë kanë mbërritur menjëherë në vendin e ngjarjes. Aktualisht, grupi hetimor, nën drejtimin e Prokurorisë, po punon intensivisht për dokumentimin e plotë të rrethanave dhe përcaktimin e shkaqeve të sakta që çuan në këtë aksident me pasoja fatale.
Reklamë e Sponsorizuar
Ky artikull është përgatitur dhe verifikuar nga redaksia e Lajmet e Reja. Të gjitha të drejtat janë të rezervuara.
Reklamë e Sponsorizuar
Shpërndaj këtë lajm: