Vrasje makabër për 5 euro: Prokuroria spanjolle kërkon mbi 22 vite burg për autorin e ekzekutimit të shqiptarit

Një konflikt trivial për një shumë prej pesë eurosh dyshohet se i ka shkaktuar vdekjen tragjike shtetasit shqiptar Artjol Ramaj, i cili u shpall i zhdukur në mars të vitit 2023 në Spanjë. Pas një hetimi të thelluar që zgjati më shumë se një vit, dosja është dërguar për gjykim, ndërsa organi i akuzës ka kërkuar dënimin me 22 vjet e pesë muaj burg për 52-vjeçarin e dyshuar si autor i krimit. Ngjarja e rëndë u regjistrua në Riudarenes, në provincën e Gironas, ku viktima bashkëjetonte me të dyshuarin, i njohur me nofkën “El Seco”. Dyshja ishte angazhuar në mirëmbajtjen e një plantacioni kanabisi brenda pronës ku banonin. Humbja e gjurmëve të Ramajt u denoncua nga një i njohur i tij më 2 mars 2023, i cili kishte shprehur shqetësimin për përshkallëzimin e konflikteve të vazhdueshme mes dy bashkëbanuesve. Në fazën fillestare, policia katalanase arrestoi 52-vjeçarin për kultivim të lëndëve narkotike, por nuk pati sukses në gjetjen e gjurmëve të shqiptarit. Fati i Ramajt u zbardh vetëm më 17 prill 2023, kur një qytetar që po shëtiste qenin në një zonë pyjore pranë kompleksit rezidencial Can Fornaca, gjeti mbetje kockore njerëzore, jo shumë larg banesës ku ndodhi krimi. Sipas rindërtimit të ngjarjes nga hetuesit, autori e ka goditur viktimën për vdekje teksa ky i fundit ishte në shtrat dhe i pambrojtur. Motivi i këtij akti brutal dyshohet të ketë qenë një mosmarrëveshje për pesë euro, të cilat i akuzuari pretendonte se ia kishte marrë Ramaj. Hetuesit besojnë se autori e ka transportuar trupin në pyll për ta hedhur, me qëllim që kafshët e egra të shkatërronin provat dhe të vështirësonin identifikimin. Në vendin ku u gjetën eshtrat, autoritetet sekuestruan një thikë dhe sende të përgjakura si peshqirë, mbulesa jorgani dhe qilima. Për shkak të dëmtimeve të shkaktuara nga kafshët, ekspertët mjeko-ligjorë nuk mundën të përcaktojnë me saktësi të gjitha plagët e marra nga viktima. Familjarët kanë mundur të varrosin vetëm një pjesë të eshtrave të të riut, pasi pjesa tjetër mbetet e zhdukur. Krahas dënimit për vrasjen, prokuroria ka kërkuar edhe pesë muaj burg shtesë për akuzën e përdhosjes së kufomës. Po ashtu, kërkohet një dëmshpërblim prej 140 mijë eurosh për prindërit e viktimës dhe 35 mijë euro për motrën e tij, si kompensim për humbjen e rëndë dhe traumën e shkaktuar nga ky akt kriminal.