Asllani ‘betohet’ për suksesin e Shqipërisë: Me Maranin po gjejmë gjuhën e përbashkët, vendi i parë ishte ëndrra jonë

Pas fitores së pastër 0-2 në Budapest përballë Bjellorusisë, mesfushori i kombëtares shqiptare, Kristjan Asllani, ka ndarë mendimet e tij për ecurinë e skuadrës dhe ndikimin e trajnerit të ri, Rolando Maran. Asllani pranoi se arritja e vendit të parë në grup ishte një objektiv madhor, të cilin ekipi e kishte vendosur që në start. “Në të vërtetë, ky ishte synimi ynë kryesor. Jemi jashtëzakonisht të lumtur, pasi ky ishte një ëndërr për të gjithë ne. Tashmë na mbetet të presim sfidat e radhës për të parë se çfarë do të na rezervojë e ardhmja”, u shpreh ai. Duke komentuar punën me trajnerin Maran, ylli i mesfushës theksoi rëndësinë e durimit për të konsoliduar filozofinë e re. “Trajneri u shpreh i kënaqur me ne, pasi arriti të na kompletonte si grup. Është krejtësisht normale që çdo teknik ka nevojë për kohën e tij për të përshtatur idetë, por tashmë po fillojmë të kuptohemi shumë më mirë në fushën e lojës”, shtoi Asllani. Lojtari nuk la pa përmendur edhe frymën e grupit, duke treguar ndjeshmëri për kolegët që nuk patën mundësi të aktivizoheshin në këtë përballje. “Të gjithë e dimë peshën dhe rëndësinë e fanellës së Kombëtares. Më vjen keq për ata që nuk luajtën, por objektivi ynë mbetet i njëjtë dhe i përbashkët për të gjithë”, deklaroi ai. Në fund, Asllani u ndal edhe te episodi i penalltisë, duke e kaluar me sportivitet. “Më erdhi keq për atë moment, por nuk është problem. Goli ndihmon jashtëzakonisht shumë nga ana psikologjike, megjithatë, ajo që kishte rëndësi sot ishin tre pikët dhe jemi vërtet të lumtur që ia dolëm”, përfundoi mesfushori.