Vëllaznimi vazhdon serinë e fitoreve, mposht Prishtinën në palestrën “Shani Nushi”

Skuadra e Vëllaznimit ka vazhduar formën e lartë në Superligën e Kosovës në hendboll për meshkuj, duke regjistruar fitoren e pestë sezonale dhe të tretën radhazi në kampionat. Në ndeshjen që mbylli xhiron e tetë, të zhvilluar të dielën në palestrën sportive “Shani Nushi” në Gjakovë, vendasit triumfuan përballë Prishtinës me rezultatin 51:40. Lojën e shkëlqyer të gjakovarëve e udhëhoqën Mali Luzha dhe Matheus Henrique, të cilët realizuan nga dhjetë gola secili. Në anën tjetër, te skuadra e Prishtinës u dalluan Enis Kuleta me 15 gola dhe Altin Cacaj me dhjetë sosh. Pas këtij rezultati, Vëllaznimi renditet në pozitën e tretë të tabelës me 10 pikë të grumbulluara nga shtatë ndeshje të zhvilluara. Ndërkaq, Prishtina mbetet në vendin e parafundit me vetëm dy pikë nga gjashtë përballje.