Bytyçi kritikon Ramën: Po e shet si sukses një frazë në raportin e BE-së, Shqipëria po mbetet pas

Profesori Enver Bytyçi ka hedhur akuza të forta ndaj kryeministrit Edi Rama, duke e akuzuar atë për manipulim të opinionit publik lidhur me raportin e fundit të Komisionit Evropian. Sipas Bytyçit, kreu i qeverisë po mundohet të shfaqë si një arritje personale përmendjen e “Traktatit të Anëtarësimit” në dokumentin e KE-së, ndërkohë që në realitet Shqipëria është duke humbur hapa të rëndësishëm në rrugën drejt integrimit në Bashkimin Evropian. Në një reagim të tij, Bytyçi nënvizon se Rama e ka shfrytëzuar Asamblenë e Partisë Socialiste për të bërë propagandë me këtë togfjalësh, duke e cilësuar atë si një histori suksesi. Profesori thekson se kryeministri nuk ka treguar asnjë lloj reflektimi për vonesat 13-vjeçare në procesin integrues, duke shtuar se Rama është përqendruar më shumë te marrëdhëniet me Serbinë sesa te përmbushja e standardeve evropiane. Sipas Bytyçit, pesha që Rama i dha këtij formulimi lë të kuptohet se pas përfshirjes së tij në raport qëndron një lobim intensiv. “Fakti që kryeministri u vetëlavdërua aq shumë për një togfjalësh që kishte shkruar Marta Kos, të bën të kuptosh se sa shumë është lobuar për ta futur Traktatin e Anëtarësimit në raportin e Kosit”, shprehet ai. Megjithatë, eksperti sqaron se ky detaj nuk e ndryshon pozicionin e pafavorshëm të Shqipërisë. Ai vë në dukje se, ndërsa dikur Shqipëria ecuronte paralelisht me Malin e Zi, tashmë është shkëputur dhe është pozicionuar në një grup me Moldavinë dhe Ukrainën. Sipas tij, vendi po distancohet gjithnjë e më shumë nga objektivi i anëtarësimit. Në përfundim, Bytyçi paralajmëron për rreziqet që i kanosen vendit nëse nuk ndryshon kursi aktual qeverisës. Ai shprehet se nëse kryeministri Rama vazhdon të drejtojë vendin, Shqipëria rrezikon të zbresë edhe më poshtë në renditjen e procesit integrues, duke u radhitur pas Serbisë, Maqedonisë së Veriut, e në fund edhe pas Kosovës dhe Bosnje-Hercegovinës.