Përparim Rama në takim me Presidentin Steinmeier: Kosova angazhohet për thellimin e partneritetit me Gjermaninë

Kryetari i Komunës së Prishtinës, Përparim Rama, ka zhvilluar një takim të rëndësishëm me Presidentin e Republikës Federale të Gjermanisë, Frank-Walter Steinmeier. Ky takim u fokusua në rikonfirmimin e lidhjeve të forta mes dy vendeve dhe avancimin e bashkëpunimit të ndërsjellë. Nëpërmjet një komunikimi publik, i pari i kryeqytetit ka shprehur falënderimin e thellë të qytetarëve të Kosovës për mbështetjen e pakursyer që shteti gjerman ka ofruar ndër vite, veçanërisht në proceset vendimtare për lirinë dhe shtetndërtimin e Kosovës. Rama ka vënë theksin te domosdoshmëria e intensifikimit të raporteve dypalëshe, duke potencuar se bashkëpunimi institucional mbetet shtylla kryesore për të konsoliduar miqësinë mes Prishtinës dhe Berlinit. “Kosova është mirënjohëse për rolin e Gjermanisë në lirinë dhe shtetësinë tonë. Do të bëjmë çmos që kjo miqësi të forcohet dhe të thellohet më tej përmes bashkëpunimit institucional”, ka deklaruar Rama pas takimit.