Incident në Durrës: Arrestohen dy persona pas sulmit me vezë ndaj eskortës së kryeministrit Rama

Uniformat blu të Durrësit kanë vënë në pranga dy persona dhe kanë nisur procedimin penal për nëntë të tjerë, pasi këta të fundit kanë hedhur vezë në drejtim të eskortës së kryeministrit Edi Rama. Ngjarja është regjistruar në datën 14 nëntor, rreth orës 10:00, në zonën e Kameras, përgjatë aksit rrugor që lidh Maminasin me Gjirin e Lalzit. Sipas njoftimit zyrtar, një grup individësh tentuan të bllokonin lëvizjen e automjeteve, duke hedhur vezë dhe sende të forta drejt makinave që përbënin eskortën e kreut të qeverisë. Në pranga për veprën penale “goditje për shkak të detyrës” kanë rënë shtetasit E. L. (28) dhe A. D. (37), të dy banues në Tiranë. Ndërkohë, në gjendje të lirë po ndiqen për “prishje të qetësisë publike” nëntë persona të tjerë: E. P. (33), D. G. (50), O. D. (34), M. C. (28), L. A. (24), I. R. (31), N. S. (23) dhe J. S. (25), të gjithë banues në Tiranë, si dhe shtetasi I. Ll. (27) nga Fieri. Dosja hetimore është dorëzuar pranë Prokurorisë së Gjykatës së Shkallës së Parë të Juridiksionit të Përgjithshëm Durrës, e cila do të vijojë me veprimet e mëtejshme procedurale për zbardhjen e plotë të rrethanave të incidentit.