“Besoj te drejtësia” – Isni Kilaj udhëton drejt Hagës në prag të shpalljes së vendimit për të dhe ish-krerët e tjerë

Ish-kreu i Komunës së Malishevës dhe ish-pjesëtari i Ushtrisë Çlirimtare të Kosovës, Isni Kilaj, ka bërë të ditur se ditën e sotme është nisur drejt Hagës. Ky udhëtim vjen vetëm dy ditë para se Dhomat e Specializuara të Kosovës të japin vendimin e tyre në procedurën gjyqësore që lidhet me veprat penale kundër administrimit të drejtësisë. Në të njëjtin proces gjyqësor, krahas Kilajt, përfshihen si të akuzuar edhe ish-presidenti i vendit, Hashim Thaçi, ish-drejtori i Agjencisë Kosovare të Inteligjencës, Bashkim Smakaj, Fadil Fazliu, si dhe ish-ministri i Drejtësisë, Hajredin Kuçi. Pak para se të nisej, Kilaj ka publikuar imazhe nga momenti i përcjelljes familjare, duke shprehur besimin se verdikti që do të shpallet më 17 nëntor, duke filluar nga ora 10:00, do të jetë i drejtë. “Sot po nisem për në Hagë! Me 17 nëntor e kemi verdiktin nga Dhomat e Specializuara të Kosovës. Pres drejtësi! Sido që të jetë, gjithmonë-përjetësisht do të jem me Çlirimtarët!”, ka shkruar ai në mesazhin e tij publik. Sipas aktakuzës e cila u konfirmua zyrtarisht më 29 nëntor 2024, grupi i të akuzuarve, ku bën pjesë edhe Thaçi, përballet me pretendimet e prokurorisë për përfshirje në veprime të kundërligjshme që synonin të ndikonin te dëshmitarët gjatë procesit të gjykimit për krime lufte.