Skandal kibernetik në Francë: Të dhënat personale të 22 milionë qytetarëve krinohen nga hakerët

Një sulm masiv kibernetik i drejtuar ndaj kompanisë Maileva, e cila funksionon si degë dixhitale e operatorit postar kombëtar francez La Poste Group, ka rrezikuar dhe kompromentuar informacionet personale të afërsisht 22 milionë qytetarëve, bëjnë të ditur burimet mediatike në Francë. Sipas informacioneve të bëra publike nga shtypi vendas, ndërhyrja e paligjshme kibernetike u regjistrua gjatë mesit të muajit shtator, duke prekur drejtpërdrejt infrastrukturën e Maileva-s, kompani kjo që ushtron aktivitetin e saj nën ombrellën e Docaposte, krahut dixhital të La Poste. Të dhënat e publikuara nga platforma e specializuar në sigurinë kibernetike, Cyberattaque.org, dëshmojnë se pasojat e këtij sulmi janë shtrirë te disa ofrues të strehimit social, mes të cilëve Flandre Opale Habitat dhe Alteal, por gjithashtu kanë prekur laboratorë mjekësorë dhe pacientë të Spitalit Foch në Suresnes. Referuar raportimeve zyrtare, personat ose grupi pas këtij sulmi kanë depërtuar në brendësi të dokumenteve dhe letrave përkujtimore të pagesave, duke bërë që të bien në duar të gabuara informacione tejet të ndjeshme, siç janë numrat e faturave, datat e ndërhyrjeve apo trajtimeve mjekësore, si dhe vlerat financiare që figurojnë për shlyerje. Menjëherë pas konstatimit të këtij incidenti të rëndë, drejtuesit e Maileva njoftuan zyrtarisht autoritetin francez kompetent për mbrojtjen e të dhënave, respektivisht Komisionin Kombëtar për Teknologjinë e Informacionit dhe Liritë Civile (CNIL), si dhe kanë dorëzuar një kallëzim penal pranë organeve të drejtësisë. Nga ana e saj, kompania ka konfirmuar se të gjithë partnerët dhe klientët korporativë që janë prekur nga kjo shkelje janë vënë në dijeni në përputhje të plotë me detyrimet ligjore në fuqi, ndërkohë që autoritetet kanë hapur një hetim të gjithanshëm gjyqësor për zbardhjen e rrethanave. Vlen të theksohet se Maileva ofron shërbime të avancuara dixhitale për më shumë se 70 mijë biznese dhe klientë korporativë, duke menaxhuar procese të rëndësishme si shpërndarja e fletëpagesave, faturave dhe shërbimeve të postës së regjistruar. E gjithë kjo rrjedhje masive e të dhënave, e cila llogaritet se prek rreth një të tretën e numrit total të popullsisë në Francë, po vlerësohet nga ekspertët e fushës si një ndër incidentet më të rënda të sigurisë kibernetike të shënuara ndonjëherë në territorin francez.