Konfirmohet mungesa e Ernest Muçit: Sulmuesi nuk luan në sfidën ndaj Bjellorusisë

Kombëtarja shqiptare do të duhet të bëjë pa shërbimet e Ernest Muçit në ndeshjen e sotme vendimtare kundër Bjellorusisë, e cila do të luhet në Budapest. Sulmuesi kuqezi nuk ka arritur të rikuperohet në kohë nga dëmtimi i pësuar në takimin e mëparshëm ndaj Finlandës. Atij iu shkaktua një dëmtim pas një ndërhyrjeje të ashpër nga mbrojtësi finlandez Miro Tenho në minutën e 67-të të sfidës. Edhe pse ky takim ka një rëndësi të veçantë për ecurinë e Shqipërisë, stafi mjekësor dhe ai teknik kanë preferuar të mos rrezikojnë me shëndetin e lojtarit, duke vendosur përfundimisht që ai të mos jetë në fushë. Kujtojmë se përballja mes Bjellorusisë dhe Shqipërisë do të nisë në orën 18:00 dhe do të zhvillohet pa praninë e tifozëve në stadiumin e Budapestit.