Rrëfimi i papritur i Jay-Z: Si nisi romanca me Beyonce-n dhe fjalët e çuditshme që i tha në ditëlindjen e saj

Reperi i njohur Jay-Z ka hedhur dritë mbi hapat e parë të lidhjes së tij me bashkëshorten e tij, yllin e muzikës Beyonce, duke pranuar se në atë periudhë vuante nga papjekuria dhe frika për të shfaqur anën e tij të ndjeshme. Gjatë rrëfimeve të tij në dokumentarin ‘JÄY-Z in 8’, artisti u ndal te kënga e njohur “4:44”, e lançuar në vitin 2017. Ai pranoi se e ka tepër të vështirë ta dëgjojë këtë projekt muzikor, pasi aty pasqyrohen hapur gabimet e së kaluarës dhe dinamika e marrëdhënies me Beyonce-n. “Me shumë mundësi e kam dëgjuar këtë këngë më pak se çdo krijim tjetër timin, me përjashtim të ‘You Must Love Me’. Edhe vetëm dëgjimi i saj është sfidues. Ishte e vështirë ta realizoja dhe po aq e vështirë të ballafaqohem me të më pas”, u shpreh ai. Në tekstin e “4:44”, Jay-Z kthehet pas në kohë te nisja e romancës, duke zbuluar pasiguritë e tij të dikurshme. Ai sjell në vëmendje 21-vjetorin e këngëtares dhe mënyrën aspak tradicionale apo romantike që zgjodhi për t'i kërkuar të ishin bashkë. “Thashë ‘mos më turpëro’ në vend të ‘bëhu e imja’. Kjo ishte mënyra ime për të të kërkuar të bëheshim çift. Ishte ditëlindja jote e 21-të. Ti u rrite më shpejt se unë, ndërsa unë nuk isha gati. Për këtë të kërkoj falje”, rrëfen reperi në vargjet e këngës. Duke evokuar fillimet e historisë së tyre të dashurisë, ai pranoi se e kishte të vështirë të kalonte nga kufijtë e miqësisë te ndjenjat romantike. “Kështu nisëm të ishim bashkë. Isha kaq i papjekur dhe aq i frikësuar të tregoja anën time të brishtë, edhe pse më pëlqente ky person. Më pëlqente kjo grua. Dhe mendoja: si ta bëjmë hapin nga të folurit vetëm në telefon dhe të qenit miq, drejt të qenit çift?”, tregoi ai. Në përfundim, Jay-Z vuri në dukje se me kalimin e viteve, lidhja dhe komunikimi mes tyre kanë pësuar një zhvillim dhe pjekuri të ndjeshme.