Tensionet në Gjirin Persik: Bahreini neutralizon sulmet ajrore iraniane, Teherani pretendon goditjen e bazës amerikane

Autoritetet në Bahrein kanë njoftuar se mbrojtja e tyre ajrore ka arritur të asgjësojë disa sulme ajrore nga Irani gjatë datës 15 nëntor. Ngjarja është shoqëruar me shpërthime të fuqishme dhe aktivizim të sirenave të alarmit në të gjithë territorin e mbretërisë së Gjirit Persik, ndërkohë që Garda Revolucionare Islamike e Iranit (IRGC) ka dalë me pretendimin se ka vënë në shënjestër një instalim ushtarak të Shteteve të Bashkuara. Sipas forcave të armatosura të Bahreinit, pajisjet e mbrojtjes ajrore neutralizuan me sukses kërcënimet përpara se ato të arrinin shënjestrat e parapara. Me këtë rast, Teherani u kritikuar ashpër për vazhdimin e një qasjeje sistematike dhe armiqësore ndaj shtetit të Bahreinit. Në të njëjtën linjë, Ministria e Jashtme e Bahreinit theksoi se vendi refuzon kategorikisht kthimin e territorit të tij në një shesh betejë për larje hesapesh, duke e ngarkuar plotësisht Iranin me përgjegjësinë për këto sulme dhe pasojat e tyre. Nga ana tjetër, IRGC-ja iraniane deklaroi përmes mediave shtetërore se kishte hedhur gjashtë dronë drejt një sistemi radari të mbrojtjes ajrore amerikane, i vendosur në bazën e helikopterëve Al-Riffa brenda territorit të Bahreinit. Derimë tani, nuk ka ende asnjë konfirmim zyrtar nga ana e Uashingtonit apo e autoriteteve vendase nëse ky instalim radarësh ka pësuar dëmtime nga sulmi i pretenduar. Duke iu referuar burimeve nga terreni, agjencia e lajmeve AFP bëri të ditur se shpërthimet e para u regjistruan rreth orës 4:00 të mëngjesit sipas orës lokale, të ndjekura nga një valë e dytë shpërthimesh rreth orës 6:30. Sirenat e alarmit dhe thirrjet e autoriteteve për banorët që të kërkonin strehim u dëgjuan gjatë gjithë kësaj kohe, pa u përcaktuar fillimisht burimi i rrezikut. Ministria e Brendshme u bëri thirrje qytetarëve që të ruanin gjakftohtësinë, të afroheshin te strehimet më të afërta të sigurta dhe të informoheshin ekskluzivisht përmes kanaleve zyrtare shtetërore. Bahreini, vendndodhja e Flotës së Pestë të Marinës amerikane, ka qenë vazhdimisht në shënjestër të sulmeve iraniane që nga shpërthimi i konfliktit më 28 shkurt, i cili nisi pas sulmeve të përbashkëta amerikane dhe izraelite ndaj Iranit. Incidenti i 15 nëntorit ndodhi vetëm dy ditë pasi IRGC-ja kishte deklaruar se kishte sulmuar një tjetër instalim radari amerikan të paralajmërimit të hershëm në Bahrein. Gjatë atij incidenti, ushtria amerikane njoftoi se kishte shkatërruar dy dronë që synonin ishullin, pa u raportuar viktima apo dëme materiale. Me zhvillimet e fundit, Bahreini goditet dy herë brenda një harku kohor prej tri ditësh, pas një periudhe të gjatë qetësie. Këto zhvillime vijnë në një kohë kur përpjekjet diplomatike për t'i dhënë fund krizës afër nëntëmujore vazhdojnë të mbeten pa ndonjë rezultat konkret, pavarësisht armëpushimit të mëparshëm. Në planin rajonal, Irani ka bllokuar lundrimin në Ngushticën e Hormuzit, e cila përbën një arterie jetike për transportin ndërkombëtar të naftës, ndërsa ka ndërmarrë sulme të vazhdueshme me raketa dhe mjete fluturuese pa pilot kundër infrastrukturës ushtarake dhe civile në rajon. Në frontin tjetër, presidenti i SHBA-së, Donald Trump, u ka bërë të qartë këshilltarëve të tij më të afërt se mund të përmbahet nga fushata të reja bombardimesh kundër Iranit, me kusht që Teherani dhe rebelët Huthi në Jemen të ndalin provokimet, raporton agjencia Reuters. Megjithatë, kreu i Shtëpisë së Bardhë ka theksuar se embargoja detare amerikane ndaj Iranit do të mbetet në fuqi pa ndryshime. Ndërkohë, forcat e armatosura të Arabisë Saudite njoftuan gjithashtu se më 15 nëntor kanë kapur dhe neutralizuar dy raketa balistike të lëshuara nga Huthit drejt kryeqytetit Riad, si dhe tri dronë të tjerë në Provincën Lindore të mbretërisë, e cila është e pasur me burime nafte.