Arsene Wenger refuzon sfidën ndaj Gianni Infantinos për drejtimin e FIFA-s

Arsene Wenger ka marrë vendimin përfundimtar për të mos hyrë në garë për postin e presidentit të FIFA-s, duke hequr kështu mundësinë e një sfide direkte ndaj Gianni Infantinos në zgjedhjet e ardhshme. Sipas informacioneve nga media britanike, UEFA kishte shfaqur interes dhe kishte synuar të bindte ish-trajnerin legjendar të Arsenalit që të merrte përsipër këtë sfidë për të marrë drejtimin e institucionit më të lartë të futbollit global. Megjithëse 77-vjeçari u konsiderua si një alternativë mjaft e fortë dhe me autoritet për të garuar kundër Infantinos, ai ka zgjedhur përfundimisht të qëndrojë jashtë këtij procesi zgjedhor. Një vendim i tillë e vendos shtëpinë e futbollit evropian para një sfide kohore, pasi sipas të dhënave të publikuara, kanë mbetur vetëm katër ditë në dispozicion për të gjetur dhe mbështetur një alternativë tjetër që do të garojë përballë kreut aktual të FIFA-s. Kujtojmë se procesi zgjedhor për kreun e organizatës botërore të futbollit është caktuar të zhvillohet më 18 mars 2027, në qytetin e Rabatit në Marok. Deri në këtë fazë, krahas Infantinos, në garë janë zyrtarizuar edhe dy kandidatura të tjera: kreu i Federatës Japoneze të Futbollit, Kozo Tashima, si dhe ish-futbollisti i Tottenhamit, Ramon Vega.