Valë dhune në familjet kosovare: Policia regjistron 8 raste brenda 24 orëve në Prishtinë e Gjakovë

Fenomeni i dhunës në familje po vazhdon të mbetet një nga sfidat më shqetësuese për shoqërinë në Kosovë. Sipas raportit 24-orësh të Policisë së Kosovës, vetëm të shtunën janë denoncuar tetë raste të reja të kësaj natyre, të cilat kanë ndodhur kryesisht në rajonin e Prishtinës dhe atë të Gjakovës. Në rajonin e kryeqytetit janë regjistruar tri ngjarje me elemente të dhunës familjare. Në Prishtinë, një person është prangosur me dyshimin se ka ushtruar dhunë psikologjike ndaj babait të tij; i dyshuari është liruar në procedurë të rregullt pas intervistimit. Po në Prishtinë, një grua ka raportuar se është sulmuar fizikisht nga ish-bashkëshorti, i cili më pas ka lënë në rrugë pa përkujdesje tre fëmijët e tyre të mitur. Nëna me fëmijët janë dërguar në strehimore, ndërsa i dyshuari mbetet në kërkim nga organet e rendit. Ndërkaq, në Podujevë, hetuesit kanë arrestuar një person i cili ushtroi dhunë fizike ndaj bashkëshortes së tij. Gruaja ka marrë trajtimin e nevojshëm mjekësor, ndërsa gjatë kontrollit në shtëpinë e të dyshuarit policia gjeti dhe konfiskoi një pistoletë me karikator, katër fishekë si dhe një thikë. Autori është dërguar në mbajtje me urdhër të prokurorit. Nga ana tjetër, rajoni i Gjakovës ka shënuar pesë raste të tjera të dhunës. Në qytetin e Gjakovës, një djalë është ndaluar nga policia pasi dyshohet se në vazhdimësi ka ushtruar dhunë fizike e psikike ndaj nënës së tij. Viktima ka refuzuar të strehohet, ndërsa i dyshuari është dërguar prapa grilave. Po në Gjakovë janë raportuar edhe tri raste të tjera: në njërin prej tyre, një person u arrestua për dhunë psikologjike ndaj bashkëshortes dhe u lirua në procedurë të rregullt; në rastin tjetër, një mashkull u dërgua në mbajtje pasi sulmoi fizikisht një grua, e cila ka marrë ndihmë mjekësore. Gjithashtu, një burrë ka denoncuar partneren e tij se e ka kanosur përmes telefonit. E dyshuara është liruar pas marrjes në pyetje, kurse viktimës i është lëshuar urdhër mbrojtës emergjent. Po ashtu, në Malishevë është prangosur një person i cili ka fyer dhe kanosur bashkëshorten e tij. Me vendim të prokurorit kujdestar, edhe ky i dyshuar është dërguar në mbajtje.