Arsene Wenger refuzon sfidën ndaj Infantinos: Kush do ta drejtojë FIFA-n?

Arsene Wenger ka konfirmuar se nuk do të jetë pjesë e garës për postin e presidentit të FIFA-s. Legjenda e futbollit ka zgjedhur të mos i hyjë kësaj beteje zgjedhore, duke hequr dorë nga mundësia për të sfiduar kreun aktual, Gianni Infantino, në procesin që pritet të zhvillohet vitin e ardhshëm. Sipas informacioneve të fundit, UEFA kishte shfaqur interes të lartë për ta bindur 77-vjeçarin që të merrte përsipër këtë sfidë, duke e konsideruar atë si një figurë me peshë dhe besueshmëri të lartë për të kërkuar ndryshimin në krye të institucionit më të lartë të futbollit botëror. Megjithatë, vendimi përfundimtar i Wengerit ka qenë negativ. Ky zhvillim e ka lënë UEFA-n në një pozitë mjaft delikate. Duke qenë se afati për të zyrtarizuar një kandidaturë alternative është drejt përfundimit, organizata evropiane ka vetëm katër ditë kohë në dispozicion për të gjetur një emër tjetër që do të garonte kundër Infantinos. Zgjedhjet për kreun e FIFA-s janë caktuar të mbahen më 18 mars 2027 në Rabat të Marokut. Deri në këto momente, përveç presidentit aktual, në garë janë zyrtarizuar presidenti i Federatës Japoneze të Futbollit, Kozo Tashima, si dhe ish-futbollisti i Tottenhamit, Ramon Vega.