Dënimi i rëndë: Portieri i FC Andorra pezullohet me 12 ndeshje pas përplasjes fatale në fushë

Komiteti Disiplinor i Federatës Spanjolle të Futbollit ka marrë një vendim drastik këtë të premte, duke pezulluar me 12 ndeshje portierin e FC Andorra, Jesus Owono. Ky sanksion vjen pas një incidenti të rëndë të ndodhur në fushën e blertë, i cili fatkeqësisht i mori jetën sulmuesit të Tenerife-s, Jesus de Miguel. Ngjarja tragjike ndodhi më 2 nëntor gjatë një ndeshjeje të divizionit të dytë spanjoll. Owono u ndëshkua me karton të kuq pasi doli nga zona e tij drejt mesfushës për të ndërhyrë në një top të lartë, moment në të cilin u përplas fuqishëm me 30-vjeçarin De Miguel. Pas goditjes, sulmuesi pësoi arrest kardiak dhe, pavarësisht dërgimit të menjëhershëm në spital, ai ndërroi jetë të nesërmen. Në arsyetimin e vendimit, komiteti u mbështet në raportin e gjyqtarit, i cili e përshkroi ndërhyrjen e portierit si një “goditje të dhunshme në gjoks me këmbë, duke përdorur forcë të tepruar ndaj kundërshtarit”. Në deklaratën zyrtare, institucioni theksoi se rezultati fatal i këtij incidenti e bën të pashmangshme vendosjen e sanksionit maksimal prej 12 ndeshjesh, duke e konsideruar masën si tërësisht të justifikuar përballë natyrës së sjelljes së lojtarit. Pas kësaj ngjarjeje tronditëse, portieri i kombëtares së Guinesë Ekuatoriale, Jesus Owono, i ka përshkruar këto ditë si periudhën më të errët të jetës së tij. Në një reagim zyrtar të bërë publik nga klubi i tij javën e kaluar, ai shprehu vështirësinë për të gjetur fjalët e duhura për të përshkruar traumën e përjetuar. “Ndjej një dhimbje të pamatë për humbjen e Jezusit. Mendimet e mia janë me të, me familjen e tij dhe me të gjithë ata që e donin,” u shpreh Owono, duke reflektuar mbi tragjedinë që ka shokuar opinionin sportiv spanjoll.