Foda pas barazimit me Izraelin: Pika e fituar pas përjashtimit të Hoxhës, ndjeva pasion te lojtarët

Pas përfundimit të përballjes me Izraelin, përzgjedhësi i Kosovës, Franco Foda, u është përgjigjur pyetjeve të gazetarëve në konferencën për media, duke bërë një analizë të rrjedhës së lojës. I pyetur nëse ky barazim duhet të shihet si dy pikë të humbura për ekipin e tij, strategu gjerman ofroi një këndvështrim më pragmatik, duke marrë parasysh rrethanat e krijuara gjatë ndeshjes. “Deri në minutën e 67-të, mund të thuhet se po linim pikë në fushë, mirëpo pas ndëshkimit me karton të kuq të Veldin Hoxhës, situata ndryshoi. Duke qenë me një lojtar më pak, e konsideroj këtë një pikë të fituar. Pasi mbetëm me 10 lojtarë, skuadra tregoi karakter të lartë, luftoi me pasion dhe performoi në mënyrë të shkëlqyer deri në fishkëllimën e fundit”, deklaroi Foda.