Defekt në rrjetin e ujësjellësit: Disa lagje të Prishtinës mbesin pa ujë

Kompania Rajonale e Ujësjellësit “Prishtina” ka njoftuar qytetarët për një ndërprerje të menjëhershme të furnizimit me ujë të pijshëm, si pasojë e dëmtimit të një gypi në zonën e Hajvalisë. Bëhet fjalë për një defekt të rëndë në gypin me diametër DN 200, i cili ka detyruar kompaninë të ndërpresë shërbimin në disa pjesë të kryeqytetit për të mundësuar intervenimin e nevojshëm. Sipas njoftimit zyrtar, zonat që janë prekur nga kjo ndërprerje përfshijnë lagjen Veternik, hapësirat përreth Gorenjes, zonën te Rezonanca, si dhe lagjet Qershia, Qëndresa dhe Nic. Ekipet teknike të ujësjellësit ndodhen tashmë në terren. Ata janë angazhuar maksimalisht për riparimin e dëmit në kohë sa më të shkurtër, në mënyrë që furnizimi me ujë të rikthehet në normalitet për të gjithë konsumatorët e prekur.