Mikrofoni i lënë hapur zbulon bisedën e sikletshme mes kryeministrit australian dhe ministrit të tij

Një situatë e pazakontë dhe plot siklet është regjistruar mes kryeministrit të Australisë dhe njërit prej ministrave të kabinetit të tij, gjatë një momenti që tashmë është shndërruar në virale në rrjet. Ngjarja ka ndodhur gjatë Konferencës së Kombeve të Bashkuara për Ndryshimet Klimatike (COP31), e cila po zhvillohet në Antalia të Turqisë. Kryeministri australian, Anthony Albanese, duket se ka harruar mikrofonin e tij të ndezur gjatë një pauze mes takimeve zyrtare, duke bërë që biseda e tij private me ministrin e Klimës, Chris Bowen, të transmetohet pa vetëdije. Sipas raportimeve të mediave ndërkombëtare, dy zyrtarët e lartë po diskutonin mbi rreziqet e mundshme të rrezatimit nga pajisjet celulare, ndërkohë që në bisedë e sipër mes kolegëve ka pasur edhe batuta me natyrë intime. "A e mban telefonin këtu?", e pyeti kryeministri Albanese kolegun e tij, ndërsa vendosi dorën në xhaketë, pranë zemrës. Pasi ministri Bowen u përgjigj se e mban atë "zakonisht" në xhepin e brendshëm të xhaketës, shefi i ekzekutivit australian iu përgjigj shkurt dhe prerazi me vetëm një fjalë: "Mos". Vlen të kujtohet se kryeministri Anthony Albanese, i cili ndodhet në qendër të vëmendjes për këtë incident, më parë ka tërhequr vëmendjen e opinionit publik edhe përmes deklaratave të tij ku ka folur hapur për rrënjët e tij arbëreshe.