Operacioni “Brothers” në Mirditë: Arrestohet 23-vjeçari për plagosjen e rëndë të 38-vjeçarit, shpallet në kërkim vëllai i tij

Policia e Shtetit ka vënë në pranga këtë të shtunë në qytetin e Rrëshenit një 23-vjeçar që figuronte i shpallur në kërkim, i cili së bashku me vëllain e tij – aktualisht në arrati – dyshohet se kanë sulmuar brutalisht me mjete të forta një 38-vjeçar. Sipas njoftimit zyrtar të autoriteteve, uniformat blu kanë ndaluar shtetasin A. Gj., 23 vjeç, ndërkohë që vijojnë kërkimet për kapjen e vëllait të tij, J. Gj., 31 vjeç. Ngjarja për të theksuar ka ndodhur më 27 tetor 2026, ku dy vëllezërit, në bashkëpunim me njëri-tjetrin, dyshohet se kanë dhunuar fizikisht duke përdorur mjete të forta shtetasin E. Gj., 38 vjeç. Falë informacioneve të siguruara përmes rrugëve operative dhe intensifikimit të punës për vënien para përgjegjësisë të personave në kërkim, Sektori për Hetimin e Krimeve të Rënda në Drejtorinë Vendore të Policisë Lezhë, në koordinim me Forcën e Posaçme “Shqiponja”, Seksionin e Mbështetjes Operacionale dhe efektivët e Komisariatit të Policisë Mirditë, kurorëzuan me sukses operacionin policor të koduar “Brothers”. Në kuadër të këtij aksioni, u bë e mundur kapja dhe ndalimi i 23-vjeçarit A. Gj., i cili banon në fshatin Ndërfushaz të Rrëshenit. Ky shtetas ishte shpallur kërkim pasi Gjykata e Shkallës së Parë e Juridiksionit të Përgjithshëm Lezhë i kishte caktuar masën e sigurisë “Arrest në burg”, nën akuzën e kryerjes së veprës penale “Plagosja e rëndë me dashje”, e kryer në bashkëpunim. Në përfundim të veprimeve të para hetimore, materialet procedurale i u dorëzuan Prokurorisë pranë Gjykatës së Shkallës së Parë të Juridiksionit të Përgjithshëm Lezhë, për ndjekjen e mëtejshme të hapa ligjorë.