Barcelona synon një transferim të bujshëm, por me xhepa të zbrazët

Barcelona po kalon një nga periudhat më të vështira të viteve të fundit, jo vetëm sa i përket rezultateve, por edhe planifikimit për të ardhmen. Në një kohë kur skuadra po përballet me mungesa të theksuara në qendër të mbrojtjes për shkak të lëndimeve të përsëritura, trajneri Hansi Flick dhe drejtori sportiv Deco e kanë të pamundur të ndërhyjnë, për shkak të situatës së vështirë financiare, e cila po ia lidh duart drejtuesve të klubit dhe po e vështirëson transferimin e objektivave kryesorë. Sipas gazetës spanjolle “Marca”, Flick dhe Deco duan ta përforcojnë repartin defensiv gjatë afatit kalimtar të janarit. Qendra e mbrojtjes është zona më e goditur nga lëndimet dhe ata insistojnë se nevojitet përforcim urgjent, nëse skuadra dëshiron të luftojë për çdo trofe deri në fund të sezonit. Problemi nuk është dëshira, por mundësia. Drejtuesit e klubit nuk duan të transferojnë një futbollist profesionist vetëm për gjashtë muaj, apo dikë që nuk do ta përmirësonte cilësinë e skuadrës aktuale. Ata synojnë një mbrojtës të nivelit të lartë, i cili do të kishte një të ardhme afatgjatë në klub, një qendërmbrojtës të klasit botëror, që mund ta udhëheqë repartin defensiv për vite me radhë. Një futbollist i tillë kërkon investim të madh financiar, të cilin klubi aktualisht nuk mund ta përballojë. Kjo i shpjegon vështirësitë dhe javët që kanë kaluar pa ndonjë përparim të dukshëm. Barcelona vazhdon të jetë e përkushtuar ndaj rregullit 1:1, i ndihmuar pjesërisht edhe nga rinovimi i kontratës së Raphinhas, i cili e zgjat marrëveshjen aktuale dhe i shpërndan ndryshe pagesat e saj. Edhe rritja e pagës së tij nuk do të hyjë në fuqi menjëherë. Ajo do të nisë nga sezoni i ardhshëm, prandaj nuk do të ndikojë në kufirin aktual të pagave. Rinovimet e kontratave tregojnë edhe anën tjetër të situatës. Marrëveshjet e reja me Xavi Espart, rinovimi i afërt i Marc Bernal, si dhe kontratat aktuale të Bryan Farinas dhe Gerard Martin, ndikojnë në shpenzimet e përgjithshme të skuadrës. Kjo shpjegon një pjesë të vështirësive të Barcelonës për të realizuar transferime gjatë afatit kalimtar të janarit. Si drejtuesit në “Camp Nou”, ashtu edhe ata në qendrën sportive “Joan Gamper”, kanë një qëndrim të qartë: nuk duan një transferim të përkohshëm për disa muaj. Synimi është përforcimi i repartit defensiv me një qendërmbrojtës të nivelit të lartë, një marrëveshje që kërkon shpenzime të cilat klubi aktualisht nuk mund t’i përballojë, përveç nëse largohet ndonjë futbollist. Për momentin, nuk ka asnjë marrëveshje të avancuar në këtë drejtim. Vëmendja kryesore është te Alejandro Balde. Klubi shpreson që mbrojtësi i majtë të largohet gjatë janarit, por e ardhmja e tij mbetet e paqartë. Deri më tani, ai ka treguar pak interesim për t’u larguar, ndërsa ofertat që i janë paraqitur nuk kanë qenë plotësisht të kënaqshme. Drejtuesit besojnë se situata e tij aktuale në skuadër mund t’ia ndryshojë mendjen gjatë javëve të ardhshme, por ende nuk janë të sigurt për këtë. Dyert e Barcelonës janë të hapura edhe për largime të tjera, pasi klubi ka nevojë të shesë futbollistë. Megjithatë, jo i gjithë ekipi është në shitje. Ka futbollistë të paprekshëm si Raphinha, Pedri, Cubarsi dhe Lamine Yamal, por drejtuesit janë të gatshëm të dëgjojnë oferta për disa prej lojtarëve të tjerë. Deco dhe ekipi i tij tashmë kanë përpiluar një listë me mbrojtësit e mundshëm. Të gjithë tejkalojnë buxhetin aktual të klubit, por drejtuesit sportivë nuk përjashtojnë asnjë mundësi. Shpresa për përforcime mbetet te afati kalimtar i verës, edhe pse detyra nuk do të jetë aspak e lehtë. Që nga vera, drejtuesit e Barcelonës e kanë ditur se transferimi i një futbollisti në janar do të ishte i komplikuar për shkak të gjendjes financiare të klubit. Megjithatë, puna vazhdon. Ata po zhvillojnë takime me disa futbollistë, disa prej të cilëve ende nuk janë bërë publikë, që përputhen me profilin e kërkuar. Emra si Tah, Bastoni, Nistad, Gvardiol, Nathan dhe Rees janë aktualisht jashtë mundësive të Barcelonës, pavarësisht dëshirës së klubit për t’i transferuar. Megjithatë, drejtuesit nuk përjashtojnë asgjë, pasi situata mund të ndryshojë. Një largim i papritur mund ta hapë rrugën për një transferim. Po ashtu, ndonjë prej objektivave mund të detyrohet të ndërrojë skuadër, madje edhe në formë huazimi. Në Barcelonë mbizotëron optimizmi për gjetjen e një zgjidhjeje, por koha po kalon dhe reparti defensiv ka nevojë urgjente për përforcime.