Kurti: Kosova i ka përmbushur kriteret për statusin e vendit kandidat, BE-ja duhet të veprojë

Në një intervistë për rrjetin prestigjioz francez FRANCE 24, kryeministri i Kosovës, Albin Kurti, ka ritheksuar vendosmërinë e shtetit për t'u bërë pjesë e familjes evropiane. Pavarësisht se kanë kaluar katër vjet nga dorëzimi i aplikimit për anëtarësim, Kosova mbetet ende në pritje të marrjes së statusit të vendit kandidat, një situatë që kreu i ekzekutivit e konsideron të pabarabartë. Kurti shprehu keqardhje që Kosova mbetet e vetmja në kontinentin evropian pa këtë status, duke sqaruar se pengesa kryesore qëndron te mungesa e një kërkese nga Këshilli Evropian drejtuar Komisionit për hartimin e një opinioni mbi vendin. Ai nënvizoi se institucionet kosovare kanë realizuar detyrat e shtëpisë në fusha kyçe si sundimi i ligjit, lufta kundër korrupsionit, liria e medias dhe standardet demokratike. Kryeministri refuzoi idenë e procedurave të shpejtuara apo anashkalimit të rregullave, duke kërkuar një proces të bazuar strikt në merita. Ai theksoi gatishmërinë e plotë të qeverisë për t'iu përgjigjur çdo pyetësori që do t'i dërgohej vendit, me shpresën se brenda muajve në vijim do të zhbllokohet ky proces. Kur u pyet për pesë shtetet mosnjohëse të BE-së (Spanja, Qipro, Rumania, Greqia dhe Sllovakia), Kurti vlerësoi se është shënuar përparim gradual në komunikim. Ai përmendi shembuj konkretë, si njohja e pasaportave nga Spanja dhe ngritja e nivelit të zyrës në Athinë. Sipas tij, diversiteti në qëndrimet për njohjen nuk duhet të jetë pengesë për integrimin, pasi BE-ja ka gjetur më parë formula kreative për të bashkëpunuar me Kosovën. Lidhur me vërejtjet e Brukselit për sistemin gjyqësor, kryeministri pranoi sfidat dhe theksoi se reformat janë në rrugë e sipër, veçanërisht me krijimin e byrosë për konfiskimin e pasurisë së pajustifikueshme. Ai argumentoi se vetë procesi i negociatave për anëtarësim do të shërbente si një katalizator i fuqishëm për të avancuar reformat e thella në drejtësi dhe administratë. Së fundi, në lidhje me marrëdhëniet me Serbinë, Kurti u shpreh se është ende herët për të dhënë një vlerësim pas zhvillimeve të fundit politike në Beograd, por rikonfirmoi përkushtimin e Prishtinës për një normalizim të plotë të marrëdhënieve, të përqendruar në njohjen reciproke.